Mike ទម្លាយស្ថានភាពខ្លួន ពេលត្រូវជាប់នៅក្នុងផ្ទះអស់រយៈពេល ៤១ ថ្ងៃ មិនអាចចេញទៅណារួច

នៅខណៈនេះទីក្រុងសៀងហៃ ប្រទេសចិន កំពុងតែមានការរាតត្បាតនៃជំងឺកូវីដ-១៩ យ៉ាងគំហុក ដល់ថ្នាក់អាជ្ញាធរសម្រេចបិទខ្ទប់តំបន់មួយចំនួនមួយរយៈសិន ដើម្បីទប់ស្កាត់នៃការរីករាលដាលជំងឺកូវីដ-១៩ ក្នុងប្រទេស។

ដោយឡែក បើងាកមកមើលតារាប្រុស Mike Angelo ឯណេះវិញ  ពេលនេះកំពុងតែស្នាក់នៅទីក្រុងសៀងហៃ ដើម្បីបំពេញការងារសិល្បៈ ហើយស្របពេលដែលទីក្រុងសៀងហៃត្រូវបានបិទខ្ទប់នោះ គឺតារាប្រុសរូបនេះមិនអាចទៅណារួចឡើយ។

មិនតែប៉ុណ្ណោះ ថ្មីៗនេះ តារាប្រុស Mike បានចេញមកបង្ហោះរូបភាពក៏ដូចជាទម្លាយថា លោកបានស្នាក់នៅក្នុងផ្ទះអស់រយៈពេល ៤១ ថ្ងៃហើយ ដោយពុំអាចចេញទៅមកណាបានឡើយ។ ក្នុងរយៈពេល ៤១ ថ្ងៃនេះតារាប្រុស Mike ក៏បានត្អូញត្អែរនូវរឿងរ៉ាវលំបាកមួយចំនួន ខណៈដែលនៅបិទខ្ទប់ក្នុងផ្ទះនោះផងដែរ។

Mike បានបង្ហើបតាមរយៈការបង្ហោះសារលើគណនីអ៊ីនស្ត្រាក្រាមថា ៖ «គ្រាន់តែធ្វើចត្តាឡីស័កអស់រយៈពេល ៤១ ថ្ងៃ មួយថ្ងៃៗ អានសៀវភៅ ប្រជុំតាមអនឡាញ ហាត់ប្រាណ ចៀនពងទាញ៉ាំ លាងចាន បោកសម្លៀកបំពាក់ និង សម្អាតបន្ទប់ ដោយខ្លួនឯង»។

ជាមួយនឹងការបង្ហោះនេះ គេក៏ឃើញមហាជនអ្នកគាំទ្ររបស់លោកចូលទៅបញ្ចេញមតិអាណិត និង ជូនពរឱ្យលោកមានសុវត្ថិភាពចៀសឆ្ងាយពីជំងឺកូវីដ-១៩ ផងដែរ៕