កាន់តែផ្អែម! MUC 2021 ងិន ម៉ារ៉ាឌី និង គូស្នេហ៍ បណ្ដើរគ្នាយ៉ាងផ្អែមល្ហែម ស្ទើរមិនឃ្លាតមួយជំហាន
កាលពីប៉ុន្មានថ្ងៃមុន មហាជនអ្នកគាំទ្រវិស័យបវរកញ្ញាហាក់នាំគ្នាបើកភ្នែកធំៗដោយការភ្ញាក់ផ្អើល បន្ទាប់ពីស្រីស្អាតម្ចាស់មកុដ Miss Universe Cambodia 2021 កញ្ញា ងិន ម៉ារ៉ាឌី ស្រាប់តែបង្ហាញរូបថតអង្គុយលើភ្នៅបុរសសង្ហាម្នាក់យ៉ាងស្និទ្ធស្នាលបំផុត ដែលមហាជនជាច្រើនយល់ថានាង និង បុរសសង្ហារូបនោះគឺជាគូស្នេហ៍។
ចាប់តាំងពីបង្ហាញរូបថតស្វីតខ្លាំងនៅលើបណ្ដាញសង្គមជាមួយប្រុសសង្ហាសាច់ដុំមាំដែលមានឈ្មោះថា Vannora Tith រូបនោះមក ងិន ម៉ារ៉ាឌី ក៏ចាប់ផ្ដើមបណ្ដើរប្រុសស្អាតរូបនេះដោយបើកចំហដូចគ្នា។ តួយ៉ាងថ្មីៗនេះ ម៉ារ៉ាឌី បាននាំគូស្នេហ៍ទៅកម្មវិធីបង្ហាញម៉ូដដ៏ធំមួយ ដើរកៀកដៃគ្នាយ៉ាងត្រសង បង្ហាញពីស្នេហាផ្អែមល្ហែមបំផុត។
លើសពីនេះ ថ្មីៗនេះ ងិន ម៉ារ៉ាឌី ក៏បានបន្ថែមជាតិស្ករក្នុងចំណីចក្ខុអ្នកលេងបណ្ដាញសង្គមជាថ្មី គឺនាងបានបង្ហោះរូបថតកៀកកើយជាមួយមិត្តប្រុសនៅលើគណនីហ្វេសប៊ុកផ្ទាល់ខ្លួនប៉ុន្មានសន្លឹកទៀត ស្ដែងពីភាពល្អូកល្អិនចំពោះគ្នាកាន់តែខ្លាំង ធ្វើឱ្យអ្នកគាំទ្របញ្ចេញយោបល់អបអរសាទរ ក៏ដូចជាជូនពរដល់ស្នេហារបស់នាងព្រោងព្រាត។
មិនត្រឹមតែប៉ុណ្ណោះ រូបភាពថ្មីៗទាំងនោះ បានបង្ហាញពីការយកចិត្តទុកដាក់ដែលគូស្នេហ៍ Miss Universe Cambodia 2021 រូបនេះ ផ្ដល់ឱ្យនាង ពិតជាផ្អែមល្ហែមជាងស្ករតាំងម៉ែទៅទៀត៕
