អ្នកគាំទ្រវែកញែក! សង្ស័យ Huang Xiaoming មានស្នេហ៍ថ្មី មើលទៅស្រដៀងអតីតប្រពន្ធ
គិតមកដល់ពេលនេះ គឺ ៤ ខែមកហើយ ចាប់តាំងពីប្តី-ប្រពន្ធតារាសម្តែងល្បីរបស់ចិន Huang Xiaoming និង Angela Baby បានលែងលះគ្នា។ ឃើញថាមានពាក្យចចាមអារ៉ាមជាច្រើនបានលើកឡើងថា លោក Huang Xiaoming កំពុងមានទំនាក់ទំនងស្នេហាថ្មីជាមួយនឹងនារីហាយសូរម្នាក់ ដែលល្បីខ្លាំងនៅក្នុងបណ្តាញសង្គមចិន គឺ Ye Ke ហើយក៏មានការបញ្ចេញមតិភាគច្រើនពីអ្នកក្នុងបណ្តាញសង្គមថាស្រដៀងខ្លាំងនឹង Angela Baby អតីតភរិយារបស់លោក។
បើនិយាយដល់រឿងរ៉ាវទាក់ទងរបស់តារាប្រុសវ័យ ៤៤ឆ្នាំរូបនេះ និង Ye Ke ដែលគេសង្ស័យនៅពេលដែលគណនី Weibo របស់អ្នកទាំងពីរ បានបង្ហោះរូបថតស្រដៀងគ្នា។ ដូចជាកាលពីខែកុម្ភៈ លោក Xiaoming បានបង្ហោះនៅលើ Weibo រូបនំប៉ាវខ្លាឃ្មុំផេនដាឃ្យូតៗ ហើយក្នុងថ្ងៃដដែលនោះ Ye Ke ក៏បានបង្ហោះរូបមួយសន្លឹកដែរ គឺនំរូបផេនដាដូចគ្នា។ ព្រមទាំងមានភាពស្រដៀងគ្នាច្រើនទៀត ទើបបង្កឱ្យមានពាក្យចចាមអារ៉ាមស្នេហា។
ដូចដែលធ្លាប់បានចុះផ្សាយពីមុនហើយ Ye Ke នាងក៏ធ្លាប់បានរៀបការជាមួយនឹងប្តីសេដ្ឋី ហើយថែមទាំងមាន កូនប្រុសស្រី ២ នាក់ទៀត។ បើទោះបីជាបានរៀបការជាមួយនឹងប្តីអ្នកមានក៏ដោយ ប៉ុន្តែចំណងអាពាហ៍ពិពាហ៍របស់នាង នៅតែបរាជ័យ។ តាមពិតទៅ Ye Ke នាងគឺជាអ្នកជំនួញស្រីជោគជ័យម្នាក់ ដែលមានប៊្រេនសម្លៀកបំពាក់ផ្ទាល់ខ្លួន ហើយក៏ជាអ្នកវិនិយោផ្នែកអចលនទ្រព្យជោគជ័យមួយរូបផងដែរ។
ទោះជាយ៉ាងណា មិនថា លោក Xiaoming និង Ye Ke ពិតជាមានទំនាក់ទំនងស្នេហាជាមួយគ្នាឬអត់ទេ ក៏អ្នកនិយមលេងក្នុងបណ្តាញសង្គម នៅតែតាមដានជាប់មិនលែង ព្រោះថាសម្រស់នាងបើធៀបគ្នាគឺមើលទៅដូច Angela Baby។ ក្នុងនោះ អ្នកក្នុងបណ្តាញសង្គម ក៏បានយករូបថតចាស់របស់ Ye Ke និង អតីតភរិយារបស់ Xiaoming ដាក់ប្រដូចគ្នាផងដែរ៕
