អ្នកគាំទ្របារម្ភព្រាត! Mark Prin ប្រហែសមួយពេល ធ្វើឱ្យរបួសបែកឆ្អឹងកដៃ ត្រូវរុំបង់រាប់អាទិត្យ

ថ្មីៗនេះមហាជនអ្នកគាំទ្រទាំងឡាយ បាននាំគ្នាបារម្ភមិនស្ទើរនោះទេ ក្រោយ Mark Prin បានបង្ហោះរូបប៉ុន្មានសន្លឹកនៅបណ្តាញ IG របស់ខ្លួន ដែលបង្ហាញឱ្យឃើញពីដៃខាងស្តាំរបស់លោកកំពុងតែរបួសហើមស្ពុល។

យ៉ាងណាមិញ Mark ក៏បានបកស្រាយឱ្យមហាជនអ្នកគាំទ្របានដឹងផងដែរ ពីមូលហេតុនៃការរបួសដៃរបស់ខ្លួន ក្នុងនោះលោកបានឱ្យដឹងថា វាគឺជាឧបទ្ទវហេតុនៅកន្លែងថតរឿង ហើយលោកគឺជាអ្នកបង្កវាដោយខ្លួនឯង ដោយពេលនោះជាឈុតឆាកត្រូវប្រើអារម្មណ៍ខ្លាំង ជាឈុតឈ្លោះជាមួយនឹងឪពុកម្តាយ លោកក៏បានប្រើកម្លាំងជ្រុល ទើបធ្វើឱ្យមានរបួសបែបនេះ។

លោកបញ្ជាក់ទៀតថា នេះគឺជាកំហុសរបស់លោកផ្ទាល់ មិនមែនកំហុសមកពីកន្លែងថត ឬក្រុមការងារនោះទេ តែយ៉ាងណា លោកក៏សុំទោសទៅខាងកន្លែងថត ក៏ដូចជាការងារជាច្រើនទៀតផងដែរ ដែលត្រូវផ្អាក និងពន្យារពេលទាំងអស់។ ចំណែករបួសវិញ គឺឆ្អឹងកដៃខាងស្តាំរបស់លោកបានបែក។

ដំបូងឡើយ វាមិនអីនោះទេ តែក្រោយមកក៏ទៅថតមើល ព្រោះវាហើម ហើយបន្ទាប់ពីថតហើយ ទើបដឹងថាឆ្អឹងបែកនេះឯង។​ ហើយឥលូវនេះ គ្រូពេទ្យក៏បានឱ្យលោករុំបង់បែបនេះ រយៈពេលប្រហែល ៣ សប្តាហ៍សិន តែលោកក៏មានអារម្មណ៍ស្តាយ ក៏ដូចជាក្រែងចិត្តក្រុមការងារនៅកន្លែងថត ហើយលោកក៏បានប្រាប់គេវិញថា ថតតែមុខបានហើយ។ យ៉ាងណាមិញ មហាជនអ្នកគាំទ្រ ក៏ដូចជាមិត្តភក្តិអ្នករួមសិល្បៈមួយចំនួន ក៏បាននាំគ្នាមកជូនពរឱ្យលោកឆាប់ជាសះស្បើយផងដែរ៕