Tay Tawan តារា BL កើតមានអារម្មណ៍មួយនេះភ្លែត ពេលគណនី Twitter មានអ្នកតាមដានចូល 3M
បច្ចុប្បន្ននេះ គេសង្កេតឃើញវិស័យខ្សែភាពយន្ត និង រឿងភាគថៃ បុរសស្រឡាញ់បុរស ឬ ហៅថា BL កំពុងតែទទួលបានការគាំទ្រខ្លាំងពីសំណាក់យុវវ័យសម័យថ្មី ជាពិសេសសម្រាប់តួអង្គសម្ដែងសុទ្ធសឹងតែស្រស់សង្ហា ព្រមទាំងពោរពេញដោយទេពកោលស្យខ្ពស់។
ដោយឡែក ងាកមើលអ្នកកំលោះ Tay Tawan ឯណេះវិញ ក៏មិនធម្មតាដែរ ក្រោយពីចូលខ្លួនសម្ដែងរឿងភាគបុរសស្រឡាញ់បុរសក្នុងស្ថានីយទូរទស្សន៍ GMMTV មក តារាប្រុសវ័យក្មេងរូបសង្ហា Tay ហាក់ផ្ទុះប្រជាប្រិយភាពខ្លាំង បន្ទាប់ពីសម្ដែងក្នុងរឿង «Kiss the Series»។
សម្រាប់ Tay ជាតារាប្រុសដែលមានអត្តចរិតរួសរាយ ចូលចិត្តនិយាយកំប្លែងសើចសប្បាយ ដែលនេះបានធ្វើឱ្យបណ្ដាអ្នកគាំទ្រ មិនថាក្នុង និង ក្រៅស្រុកទេ សុទ្ធសឹងតែស្រឡាញ់ចូលចិត្តលោក។ ក្នុងនោះ តារាប្រុសរូបនេះតែងប្រើបណ្ដាញសង្គម Twitter ដើម្បីទំនាក់ទំនងជាមួយនឹងអ្នកគាំទ្រយ៉ាងស្និទ្ធស្នាលផងដែរ។
តួយ៉ាង កាលពីពេលថ្មីៗនេះ គេឃើញថាចំនួនអ្នកតាមដានលើបណ្ដាញសង្គម Twitter របស់លោកបាន កើនដល់ ៣ លាន បាត់ទៅហើយ ដោយធ្វើឱ្យតារាប្រុស Tay សម្ដែងអារម្មណ៍រីករាយជាខ្លាំង ដែលខ្លួនទទួលបានការគាំទ្រច្រើនពីមហាជន។
ក្នុងនោះលោកក៏បានចេញមកបង្ហោះសារថា ៖ «Love you 3 000 000» ផងដែរ។ យ៉ាងណាមិញ គេក៏ឃើញមានប្រិយមិត្តជាច្រើនបានចូលទៅបង្ហោះរូបអបអរសាទរលោក ព្រមទាំងភ្ជាប់ Hash Tag ថា #3MwithhTawan_V ពេញបណ្ដាញសង្គម Twitter ដូចគ្នា៕
