Ken ចេញមុខទម្លាយពីអាថ៌កំបាំង ក្រោយជាប់ងារជាបុរសសង្ហាអមតៈ

ពេលវេលាអាចធ្វើឱ្យអ្វីៗមានការប្រែប្រួលស្ទើរគ្រប់យ៉ាង តែមើលទៅមិនអាចធ្វើឱ្យសម្រស់របស់តារាប្រុស Ken Theeradeth ប្រែប្រួលបាននោះទេ ដោយនៅក្នុងវ័យ ៤៤ ឆ្នាំ ព្រមទាំងមានគ្រួសារមានកូនទៅហើយ តែលោកនៅតែស្រស់ស្អាត រហូតជាប់ងារជាបុរសសង្ហាអមតៈទៀតផង។

យ៉ាងណាមិញ ជាមួយគ្នានេះដែរ Ken ក៏បានទម្លាយពីគន្លឹះក្នុងការថែរក្សាខ្លួនឱ្យនៅក្មេងជាងវ័យ នៅក្នុងកម្មវិធីសម្ភាសមួយផងដែរ។ លោកបានឱ្យដឹងថា ការហាត់ប្រាណ និងការសម្រាកឱ្យបានគ្រប់គ្រាន់ពិតជាសំខាន់ណាស់ តែលោកឱ្យភាពសំខាន់ទៅលើការហាត់ប្រាណជាង។

លោកតែងតែព្យាហាមហាត់ប្រាណជានិច្ច ហើយក៏ព្យាយាមហាត់ទៅរហូត មិនគិតនឹងឈប់នោះទេ។ ចំណែករឿង សម្រាកវិញ លោកឱ្យដឹងថា លោកជាមនុស្សធ្វើការច្រើន និងហាត់ប្រាណច្រើន ដូចនេះត្រូវសម្រាកឱ្យបានគ្រប់គ្រាន់ដូចគ្នា​ ដោយក្នុងនោះត្រឹមម៉ោង ៩ យប់គឺលោកចាប់ផ្តើមចូលដំណេកហើយ មិននៅយូរនោះទេ ហើយភ្ញាក់ឡើងវិញនៅម៉ោង ៦ ព្រឹក។

ការញ៉ាំអាហារក៏ចូលរួមចំណែកដូចគ្នា តែសម្រាប់លោក លោកក៏ជាមនុស្សចូលចិត្តញ៉ាំ លោកមិនបានហាមខ្លួនឯងមិនឱ្យញ៉ាំនោះទេ គឺញ៉ាំធម្មតា ដោយភាគច្រើនលោកចូលចិត្តញ៉ាំសាច់ និងមិនសូវចូល​ចិត្តរបស់ផ្អែមឡើយ ហើយជាពិសេស គឺលោកមិនញ៉ាំអ្វីក្រោយម៉ោង ៨ យប់នោះទេ។ លើសពីនេះទៅទៀត លោកទៅម៉ាស្សាថែរក្សាមុខរបស់ខ្លួន ក្នុងមួយខែ ២ ដងផងដែរ។

យ៉ាងណាមិញ មហាជនអ្នកគាំទ្រពិតជាសរសើរ Ken មិនតិចឡើយ ដែលចេះថែរក្សាទាំងសុខភាព​ និងរាងកាយរបស់ខ្លួនបានល្អយ៉ាងនេះ ពិតជាសមជាតារាជើងចាស់គួរឱ្យយកតម្រាប់តាមមែន៕