ខានជួបជុំគ្នាច្រើនឆ្នាំ ពេលបានវិលមកជុំគ្នាជាថ្មី សមាជិកក្រុម S.H.E ស្រាប់តែទឹកភ្នែកឱបគ្នា
បើរំឭកដល់ក្រុមចម្រៀងស្រីតៃវ៉ាន់ S.H.E ប្រិយមិត្តជំនាន់ឆ្នាំ ២០០០ ស្ដើង ប្រាកដណាស់ជាបានស្គាល់ច្បាស់ ដោយសារតែជំនាន់នោះ ក្រុមចម្រៀងស្រីមួយក្រុមនេះ ផ្ទុះប្រជាប្រិយភាពខ្លាំង មិនថាតែមហាជនក្នុង ឬ ក្រៅស្រុកនោះឡើយ។
ដោយឡែក ក្រោយពីប្រកាសមិនបន្តកុងត្រាថ្មីក្នុងឆ្នាំ ២០១៩ រួចមក អតីតសមាជិកក្រុមចម្រៀងស្រីមួយនេះ ហាក់ស្ងប់ស្ងាត់ពីសិល្បៈ មិនសូវលេចឮដំណឹងសុខទុក្ខរបស់ពួកគេដូចកាលពីមុននោះឡើយ ដោយពួកគេបានបន្តដំណើរជីវិតរៀងៗខ្លួន។
ដោយឡែក កាលពីថ្ងៃទី ១៨ ខែមិថុនា ឆ្នាំ ២០២២ កន្លងទៅ ដែលត្រូវជាថ្ងៃកំណើតរបស់សមាជិកក្រុមម្នាក់ គឺនាង Ella Chen មហាជនអ្នកគាំទ្រហាក់មានការភ្ញាក់ផ្អើល និង បង្ហាញក្ដីនឹករឭកជាខ្លាំង ដោយឃើញវត្តមានអតីតសមាជិក ២ រូបទៀត គឺ Selina Jen និង Hebe Tien បានបង្ហាញខ្លួនពញ្ញាក់អារម្មណ៍អតីតមិត្តរួមក្រុមរបស់ពួកគេក្នុងថ្ងៃកំណើត។
ក្នុងការពញ្ញាក់អារម្មណ៍ធ្វើខួបកំណើតគម្រប់អាយុ ៤១ ឆ្នាំរបស់ Ella Chen នេះដែរ Selina និង Hebe បានទៅធ្វើដល់កន្លែងធ្វើការរបស់ Ella តែម្ដង ដែលជាហេតុធ្វើឱ្យនាងភ្ញាក់ផ្អើល និង រំភើបខ្លាំងរហូតយំសស្រាក់។
គួររំឭកផងដែរថា S.H.E គឺជាក្រុមចម្រៀងតៃវ៉ាន់មួយដែលមានសមាជិកចំនួន ៣ នាក់រួមមាន Selina Jen, Hebe Tien និង Ella Chen។ ពួកគេបានចូលប្រឡូកក្នុងសិល្បៈក្នុងឆ្នាំ ២០០១ ក្រោមការគ្រប់គ្រងរបស់ផលិតកម្ម HIM International Music ប៉ុន្តែក៏សម្រេចចិត្តលែងបន្តកុងត្រារបស់ពួកគេតទៅទៀតក្នុងឆ្នាំ ២០១៩ ដោយដើរលើផ្លូវរៀងខ្លួនវិញ៕
