ផ្ទុះចចាមអារ៉ាម Jhope និង Rosé បង្កើតចំណងស្នេហ៍ជាមួយគ្នា ក្រោយចាប់បានភស្តុតាងទាំងនេះ

ថ្មីៗនេះ មានការផ្ទុះចចាមអារ៉ាមជាថ្មី ទាក់ទងនឹងការលួចបង្កើតចំណងស្នេហ៍ជាមួយគ្នារវាង តារាប្រុស Jhope  សមាជិកក្រុមចម្រៀង BTS និងតារាស្រី Rosé សមាជិកក្រុមចម្រៀង BLACKPINK ក្រោយគេចាប់បានភស្តុតាងមួយចំនួនសង្ស័យថា អ្នកពីរបានចេញទៅញ៉ាំអាហារជាមួយគ្នាតែពីរនាក់។

ក្នុងនោះ គេបានឃើញ ចុងភៅល្បីម្នាក់ បានផុសរូបរបស់តារាប្រុសស្រីទាំងពីរ មើលទៅទំនងដូចជានៅក្នុងហាងអាហារមួយកន្លែង ក្នុងគណនីបណ្តាញសង្គមរបស់ខ្លួននៅក្នុងថ្ងៃតែមួយ។

ការផុសទាំងនេះ បានធ្វើឱ្យមហាជនអ្នកគាំទ្របានផ្ទុះការចាប់អារម្មណ៍យ៉ាងខ្លាំង ព្រោះគេសង្កេតឃើញថា Jhope និង Rosé ហាក់ដូចជាបានណាត់គ្នាមកញ៉ាំអាហារនៅកន្លែងនេះ។ លើសពីនេះទៀត សូម្បីតែថ្នាំក្រចក និងការស្លៀកពាក់ក៏ស្រដៀងគ្នាដែរ។

ភស្តុតាងទាំងនេះ បានធ្វើ​ឱ្យមហាជនមួយចំនួនសង្ស័យថា តារាទាំងពីរប្រាកដជាមានទំនាក់ទំនងណាមួយមិនខាន។ តែយ៉ាងណា មិនយូរប៉ុន្មាន ចំពោះដំណឹងដ៏រសើបមួយនេះ ស្រាប់តែមានអ្នកគាំទ្រមួយចំនួន ក៏បានចេញមុខមកបិទចចាមអារ៉ាមនេះ ដោយអះអាងថា រឿងនេះ គឺជារឿងគួរឱ្យអស់សំណើច ព្រោះតាមពិតទៅមានតារាល្បីៗច្រើនណាស់ ដែលបានទៅញ៉ាំអាហារ ក៏ដូចជាចូលរួមកម្មវីធីរបស់ចុងភៅល្បីម្នាក់នោះ ហើយចំណែករឿងពណ៌ថ្នាំក្រចកវិញ វាគ្រាន់តែជាការចៃដន្យប៉ុណ្ណោះ៕