ក្លាយជាសេដ្ឋីដោយសារ TikTok ឥឡូវ Khaby Lame ចង់ងាកមកវិស័យសម្ដែងម្ដង
កំពូលតារា TikTok ដ៏ល្បីដែលមានអ្នកតាមដានច្រើនជាងគេបំផុតលើពិភពលោក Khaby Lame ថ្មីៗនេះ បានទម្លាយឱ្យដឹងថា រូបលោកចង់ប្ដូរសាកចូលប្រឡូកវិស័យសម្ដែងវិញ។
តារា TikTok លោក Khaby Lame អាយុ ២២ ឆ្នាំ ដែលជាតារាតាមបណ្ដាញសង្គមមួយរូប ផ្ទុះប្រជាប្រិយភាពតាមរយៈវីដេអូ «Life Hacks» មានតែសកម្មភាព តែមិននិយាយស្ដីនោះ ថ្មីៗនេះកើតមានក្ដីស្រមៃបន្ទាប់ ចង់ចូលប្រឡូកវិស័យភាពយន្ត និង សង្ឃឹមថ្ងៃណាមួយអាចសម្ដែងជាមួយនឹង Will Smith។
ជាក់ស្ដែងនៅសប្ដាហ៍នេះ តារា TikTok លោក Khaby Lame បានធ្វើកិច្ចសម្ភាសជាមួយសារព័ត៌មាន TMZ ដោយអមវត្តមានជាមួយអ្នកគ្រប់គ្រងរបស់លោក មកជួយសម្របសម្រួលប្រែភាសា។ ក្នុងកិច្ចសម្ភាសនោះ Khaby បានទម្លាយថា តារាក្នុងដួងចិត្តរបស់លោកគឺ Will Smith ហើយលោកឥឡូវក៏ចាប់ផ្ដើមមានក្ដីស្រមៃចង់ក្លាយជាតារាសម្ដែង និង បង្ហាញសមត្ថភាពឱ្យដូចនឹង Will Smith ក្រោយរូបលោកមើលរឿង «The Fresh Prince of Bel-Air» មក។
គួររំឭកថា Khaby Lame មានសញ្ជាតិសេណេហ្គាល់ បានផ្លាស់ទៅនៅប្រទេសអ៊ីតាលីតាំងពីក្មេងវ័យ។ រូបលោកបានចាប់ផ្ដើមធ្វើវីដេអូលើ TikTok ក្រោយពេលធ្លាក់ខ្លួនអត់ការងារធ្វើ អំឡុងពេលរងវិបត្តិកូវីដ-១៩ រហូតផ្ទុះប្រជាប្រិយភាពខ្លាំងមកដល់សព្វថ្ងៃនេះ៕
