៤១ ឆ្នាំមែន តែកុំហក់! Fan Bingbing ត្រូវគេលាន់មាត់សរសើរថា សម្រស់ដូចក្មេងជាងម្ភៃ!
កាលពីថ្ងៃទី ១៥ ខែកក្កដា ឆ្នាំ២០២២ តារាសម្ដែងស្រី Fan Bingbing បានបញ្ចេញរូបថតដើរកម្សាន្តតាមផ្លូវនារដូវក្តៅនៅលើបណ្តាញសង្គម Weibo និង Instagram ផ្ទាល់ខ្លួនរបស់នាង។ ក្នុងឈុតរ៉ូបវែងពណ៌ក្បឿងជាមួយនឹងស្បែកជើងប៉ាតាពណ៌ ស្ពាយជាមួយនឹងកាបូបតូចខ្សែចំហៀងប្រេនម៉ាក Moynat យ៉ាងស៊ីវិល័យ។
ក្នុងនោះ ការរៀបចំស្ទីលតែងខ្លួនទាំងរូបរាងរបស់តារាស្រីរូបនេះ ក្នុងវ័យ ៤១ឆ្នាំ គឺទទួលបានការសរសើរជាច្រើនពីសំណាក់អ្នកនិយមលេងបណ្តាញសង្គមជាអ្នកគាំទ្រក្នុងប្រទេសចិន ដោយគ្រប់គ្នាក្នុងនោះបានបញ្ចេញមតិលើកសរសើរពីសម្រស់របស់នាងថា៖ «ស្អាតជាងវ័យដូចនៅក្មេងខ្ទង់ ២០ឆ្នាំ»។ ជាមួយគ្នានោះ នៅលើបណ្តាញសង្គម Instagram របស់នាងក៏ដូចគ្នា អ្នកគាំទ្ររបស់ Bingbing បានសរសើរថា៖ «រាជិនីកំពូលសម្រស់»។
ជាការពិតណាស់ Fan Bingbing នាងគឺជាតារាសម្ដែងស្រីជនជាតិចិន ដែលមានរូបសម្រស់លេចធ្លោមួយរូបក្នុងចំណោមតារាស្រីស្អាតៗក្នុងវិស័យកម្សាន្ត។ ប៉ុន្តែរូបសម្រស់របស់នាង ថ្វីដ្បិតថាបច្ចុប្បន្ននេះ តារាស្រីរូបនេះមានវ័យជ្រេក៏ពិតមែន បើនិយាយដល់សម្រស់របស់នាង ច្បាស់ណាស់មិនទាន់មានតារាស្រីជំនាន់ក្រោយរូបណាអាចជំនួសរហ្សសនាម «កំពូលសម្រស់» របស់នាងបានឡើយ៕
