វីវរហើយ! Guan Xiaotong មិត្តស្រីរបស់ Luhan កំពុងផ្ទុះប្រឈមមុខនឹងផ្លូវច្បាប់
មហាជនមួយចំនួនប្រាកដជាធ្លាប់បានស្គាល់រួចមកហើយ Guan Xiaotong ជាតារាសម្ដែងស្រីប្រចាំប្រទេសចិន ហើយក៏ជាមិត្តស្រីរបស់អតីតសមាជិកក្រុម EXO លោក Luhan ដែលពួកគេទាំងពីរ បានប្រកាសពីទំនាក់ទំនងស្នេហាជាផ្លូវការ កាលពីខែតុលា ឆ្នាំ ២០១៧ មកម្ល៉េះ។
ដោយឡែក ថ្មីៗនេះមានប្រភពមួយបានទម្លាយថា តារាសម្ដែងស្រីរូបនេះ បានប្រឈមមុខទៅនឹងបញ្ហាផ្លូវច្បាប់ដោយសារតែការគេចពន្ធ។
យោងតាមសារព័ត៍មានរបស់ Asia Today បានរាយការណ៍កាលពីថ្ងៃទី ១៩ ខែកក្កដា ឆ្នាំ២០២២ កន្លងទៅថា៖ «គូស្នេហ៍របស់តារាប្រចាំប្រទេសចិន Luhan គឺនាង Guan Xiaotong ទំនងជានឹងប្រឈមមុខតាមផ្លូវច្បាប់ ដោយសារតែបញ្ហាគេចពន្ធ»។
យ៉ាងណាមិញ ប្រភពដដែលបានអះអាងបន្ថែមទៀតថា៖ «ទោះបីជាមានពាក្យចចាមអារ៉ាមថា Luhan និងមិត្តស្រីនាង Guan Xiaotong គ្រោងនឹងរៀបការនៅខែកុម្ភៈឆ្នាំនេះក៏ដោយ ប៉ុន្តែឥឡូវគូស្នេហ៍មួយគូនេះ បានបែកគ្នាហើយ ដោយសារតែរឿងដែលបានកើតឡើងមួយនេះ»។
ទោះជាយ៉ាងណាក៏ដោយ សម្រាប់ចចាមអារ៉ាមដែលថាគូស្នេហ៍មួយនេះបានបែកគ្នា គឺពុំទាន់មានប្រភពជាផ្លូវការណាមួយដែលអាចបញ្ជាក់ច្បាស់ពីរឿងមួយនេះនៅឡើយទេ មានតែរង់ចាំតាមដានបន្តទៀត៕
