ផ្ទុះចាប់អារម្មណ៍! នូ ឧសភា បង្ហាញរូបស្និទ្ធនឹងនារីរូបស្រស់ម្នាក់ អ្នកគាំទ្រសង្ស័យថាជាគូស្នេហ៍

ជឿថាប្រិយមិត្តយុវវ័យភាគច្រើនប្រាកដជាបានជ្រាបហើយពី បុរសសង្ហាមាឌមាំ នូ ឧសភា ដែលជាម្ចាស់បទ «ព្រងើយ» ដោយកន្លងមកតារាចម្រៀងប្រុសរូបនេះ បានរាយមន្តស្នេហ៍ឆក់បានបេះដូងសុភាពនារីជាច្រើន ជាពិសេសស្នាមញញឹមរបស់ នូ ឧសភា បានរាយអន្ទាក់ស្នេហ៍ដាក់នារីៗឱ្យជ្រើមជ្រួសលង់ស្រឡាញ់លោកសឹងតែដកចិត្តមិនរួច។

បើនិយាយពីជីវិតស្នេហាវិញ តារាប្រុសរូបសង្ហានេះ គេសង្កេតឃើញថា លោក ពុំធ្លាប់ដែលបើកបង្ហាញទំនាក់ទំនងស្នេហាជាមួយនារីរូបណាជាសាធារណៈឡើយ បើទោះបីជាធ្លាប់លេចឮថាលោកមានម្ចាស់បេះដូងរួចហើយក៏ដោយ ដែលធ្វើឱ្យអ្នកគាំទ្រតែងចង់ដឹងថានារីរូបណាដែលអាចឆក់បានបេះដូងបុរសមានមន្តស្នេហ៍រូបនេះ។

ដោយឡែក ស្រាប់តែថ្មីៗនេះ នូ ឧសភា បានធ្វើឱ្យមហាជនអ្នកគាំទ្រហាក់ផ្ទុះការចាប់អារម្មណ៍ខ្លាំង បន្ទាប់ពីបានឃើញរូបភាពមួយសន្លឹកបង្ហោះលើបណ្ដាញសង្គមហ្វេសប៊ុករបស់លោក ដែលលោកបានថតឱបកៀកជាមួយនារីរូបស្រស់ម្នាក់ កំពុងធ្វើឱ្យមហាជនអ្នកគាំទ្រមានការសង្ស័យ និងបាននាំគ្នាគិតថានារីរូបនោះជាគូស្នេហ៍របស់លោកផងដែរ។

ក្នុងនោះដែរ ដ្បិតថា លោក នូ ឧសភា បានបញ្ជាក់លើ Caption ថានារីរូបស្រស់នោះ គ្រាន់តែជាអ្នកគាំទ្រមែន ប៉ុន្តែមហាជន ជាពិសេសអ្នកគាំទ្ររបស់លោក ហាក់ច្បាស់ក្នុងចិត្តខ្លាំងថាជាគូស្នេហ៍របស់លោក ព្រមទាំងបាននាំគ្នាបញ្ចេញមតិអបអរ និងជូនពរដល់រូបលោកគ្រប់គ្នាផងដែរ៕