ខានជួបគ្នាជាង ២០ ឆ្នាំ តួកូននេនសៅលិញ បង្ហាញខ្លួនលើឆាកជាមួយគ្នាជាថ្មី ផ្អើលអស់មហាជន
បើត្រឡប់ទៅអំឡុងឆ្នាំ ១៩៩៤ មហាជនជំនាន់នោះ ប្រាកដណាស់ច្បាស់ជាធ្លាប់បានទស្សនាខ្សែភាពយន្តចិនបែបគុណបុរាណ កំប្លុកកំប្លែង ដែលអ្វីដែលទាក់ចិត្តអ្នកទស្សនាជាពិសេសនោះ គឺតួអង្គកូននេនៗសៅលិញចំនួន ២ រូប ដែលមានទេពកោសល្យសម្ដែងខ្ពស់ ពូកែទាំងក្បាច់គុន និង ភាពក្រមិចក្រមើម ផ្ដល់ជាសំណើចចាក់ទឹកមិនលិចដល់អ្នកទស្សនាមិនឱ្យជិនណាយ។
ជាមួយភាពប៉ិនប្រសប់ និង ទេពកោសល្យដ៏ល្អឥតខ្ចោះនេះហើយ បានធ្វើឱ្យប្រជាប្រិយភាពតួអង្គកូននេនទាំង ២ រូបនេះ ផ្ទុះល្បីខ្ទរខ្ទារមានមហាជនស្គាល់រហូតមកទល់សព្វថ្ងៃ។ រំលងទៅអស់ជាង ២០ ឆ្នាំ មហាជនអ្នកគាំទ្រតារាប្រុសទាំង ២ រូបនេះ គឺតែងតែទន្ទឹងរង់ចាំមើលថា ពួកគេទាំង ២ អាចនឹងវិលត្រឡប់មកចាប់ដៃគ្នាសម្ដែងរឿងថ្មី បម្រើដល់អារម្មណ៍ទស្សនិកជនឬក៏អត់ ព្រោះថាចាប់តែពីធំពេញវ័យរៀងៗខ្លួនមក ពួកគេគឺបានបន្សាត់ខ្លួនដាច់ឆ្ងាយពីវិស័យភាពយន្តនេះតែម្ដង។
ដោយឡែកស្រាប់តែពេលថ្មីៗនេះ មហាជនអ្នកគាំទ្រជាច្រើនមានការរំភើបចិត្តជាខ្លាំង ក្រោយពីបានឃើញវត្តមានតារាក្នុងដួងចិត្តរបស់ពួកគេទាំង ២ រូបនេះ បានបង្ហាញខ្លួនរួមគ្នាលើឆាកកម្មវិធីមួយ។ ក្នុងកម្មវិធីនោះ ពួកគេបានរំឭកដល់រឿងអតីតកាលកុមារភាព ថតភាពយន្តជាមួយគ្នា ដែលពួកគេចាត់ទុកជាអនុស្សាវរីយ៍ចងចាំមួយដ៏ល្អបំផុត៕
