ទោះស្រឡាញ់ហួងហែងប្តីប៉ុនណា តែ Nune មិនហ៊ានហាមប្តីក្នុងរឿងមួយនេះសោះ

ជីវិតក្រៅឆាករបស់តារាសម្តែងស្រី Nune Woranuch ពិតជារលូនទៅមុខមិនចាញ់ការងារសិល្បៈនោះទេ ដោយជាពិសេសមកទល់ពេលនេះ គឺមានរយៈពេលជាង ១១ ឆ្នាំទៅហើយ ដែលនាងបានសម្រេចចិត្តសាងគ្រួសារកក់ក្តៅជាមួយនឹងស្វាមី លោក Tod ដែលជាមហាសេដ្ឋីវាល់លានប្រចាំប្រទេសថៃ ព្រមទាំងមើលថែថ្នាក់ថុ្នមនាងគ្រប់បែបយ៉ាងមិនឱ្យទាស់ចិត្តឡើយ។

យ៉ាងណាមិញ បើទោះជានៅមិនទាន់មានបុត្របំពេញគ្រួសារយ៉ាងណាក្តី តែ Nune និងស្វាមី ក៏នៅតែផ្អែមល្ហែមជាមួយគ្នាមិនដាច់ឡើយ បណ្តើរគ្នាទៅណាមកណាស្និទ្ធស្នាលកៀកកើយរហូត ហើយតែងតែរំឮកពីគ្នាទៀតផង។

ជាក់ស្តែង កាលពីថ្មីៗនេះ Nune បាននិយាយរំឮកដល់ស្វាមីទាក់ទងនឹងរឿងចំណង់ចំណូលចិត្តរបស់លោកទៀតហើយ នៅក្នុងការសម្ភាសនាកម្មវីធីមួយ។ ក្នុងនោះ នាងបានឱ្យដឹងថា មុននេះ នាងមានឱកាសបានទៅប្រទេសអ៊ីតាលី ដើម្បីទៅមើល និងផ្តល់កម្លាំងចិត្តដល់ការប្រកួតប្រណាំងឡានរបស់ស្វាមី នៅដល់ប្រទេសអ៊ីតាលីឯណោះ តែបានទៅត្រឹម​ ២៣ ថ្ងៃ ព្រោះត្រូវ​ប្រញាប់មកវិញ ដោយសារតែនៅសល់ការងារដែលមិនទាន់ធ្វើ ច្រើនគួរសម​។

ចំណែក Tod វិញ​​ គឺទើបតែបានឆ្លងកាត់ការវះកាត់ស្មា ហើយគ្រាន់តែដោះបង់រុំចេញភ្លាម ក៏ប្រញាប់ទៅចូលរួមការប្រណាំងភ្លែត ទាំងដែលពេទ្យប្រាប់ថាខែសីហាឯណោះ ទើបដោះបាន។ Tod បានព្យាយាមក្នុងការប្រកួតនេះណាស់ ទាំងដែលខ្លួនកំពុងឈឺ ព្រោះតែនេះគឺជាឱកាសល្អ រូបគាត់មិនចង់ឱ្យរបូតទៅនោះទេ។

Nune បន្តទៀតថា Tod មិនបានប្រាប់ទេ ថាគាត់នឹងឈប់ប្រកួតឡាននេះនៅពេលណា ព្រោះតែវាជាក្តីសុបិន្តរបស់គាត់តាំងពីយូរមកហើយ ហើយនាងក៏បារម្ភពីសុវត្ថិភាពរបស់លោកដែរ ប៉ុន្តែគ្រប់ពេលប្រណាំង នាងអាចត្រឹមសុំឱ្យស្វាមីជាទីស្រឡាញ់មានក្តីសុខ សុវត្ថិភាពប៉ុណ្ណោះ ​មិនបានឃាត់ឃាំងអ្វីនោះទេ។ យ៉ាងណាមិញ មហាជនអ្នកគាំទ្រទាំងឡាយឯណេះវិញ ពេលឮបែបនេះហើយ ពិតជាសរសើរទឹកចិត្តរបស់ Nune ដែលជាភរិយាណាស់ ដែលចេះយល់ចិត្តស្វាមីដល់ថ្នាក់នេះ៕