អ្នកគាំទ្ររំភើបខ្លាំង ក្រោយ វណ្ណដា ប្រកាសត្រៀមអង្រួនឆាក នៅខេត្ត-ក្រុងចំនួន ៥ នេះ!

កាលពីខែ មេសា កន្លងទៅនេះ តារាចម្រៀងរ៉េបល្បីឈ្មោះ វណ្ណដា បានធ្វើការប្រគំតន្ត្រី «$KULLTHEALBUM» ដោយជោគជ័យ ជាពិសេស លោកបានប្រកាសជាសាធារណៈដែរថា នឹងមានការប្រគំតន្ត្រីដ៏ធំបែបនេះជាបន្តបន្ទាប់នាពេលខាងមុខទៀតផង។

យ៉ាងណាមិញ នារាត្រីថ្ងៃទី ១ ខែ សីហា ឆ្នាំ២០២២ កន្លងទៅនេះ គណនីហេ្វសប៊ុកផេកផ្លូវការរបស់ វណ្ណដា បានទម្លាក់ Poster មួយដែលប្រកាសពីការប្រគំតន្រ្តីដ៏អស្ចារ្យរបស់លោកក្នុងឆ្នាំ ២០២២ នេះគឺ «SKULL TOUR» គឺនឹងខិតមកដល់ក្នុងពេលឆាប់ៗខាងមុខនេះហើយ។ ក្នុងនោះ លោកបានបញ្ជាក់ប្រាប់អំពី ខេត្ត-ក្រុងចំនួន ៥ ដែលមានការរៀបចំប្រគំតន្ដ្រី រួមជាមួយនឹងកាលបរិច្ឆេទ ដែលលោកគ្រោងនឹងទៅសម្ដែងតាមទីតាំងទាំងនោះ។

គួរឱ្យដឹងផងដែរថា ខេត្ត-ក្រុងចំនួន ៥ និង កាលបរិច្ឆេទទាំងនោះមានដូចជា៖

– ខេត្ត បាត់ដំបង ៖ ថ្ងៃទី ២០ ខែសីហា ឆ្នាំ២០២២
– ខេត្ត សៀមរាប ៖ ថ្ងៃទី ២៤ ខែសីហា ឆ្នាំ២០២២
– ខេត្ត កំពង់ចាម ៖ ថ្ងៃទី ២៧ ខែសីហា ឆ្នាំ២០២២
– ក្រុងព្រះសីហនុ ៖ ថ្ងៃទី ៣ ខែកញ្ញា ឆ្នាំ២០២២
– ក្រុងភ្នំពេញ ៖ ថ្ងៃទី ១៧ ខែកញ្ញា ឆ្នាំ២០២២

មិនតែប៉ុណ្ណោះ សម្រាប់ការប្រគំតន្ត្រីនៅក្នុងក្រុងភ្នំពេញ លោកក៏បានបញ្ជាក់ដែរថា នឹងមានការចូលរួមពីសំណាក់ភ្ញៀវកិត្តិយសពិសេសៗថែមទៀតផង។

បើក្រឡេកទៅមើលតម្លៃសំបុត្រវិញ សម្រាប់ខេត្ត-ក្រុងចំនួន ៤ ដែលមានដូចជា ខេត្តបាត់ដំបង ខេត្តសៀមរាប ខេត្តកំពង់ចាម ក្រុងព្រះសីហនុ គឺមានតម្លៃចំនួន ៧.៥ ដុល្លារ។ រីឯ ក្នុងទីក្រុងភ្នំពេញវិញ មានតម្លៃ ១៥ ដុល្លារ។

យ៉ាណាមិញ សម្រាប់សំបុត្រនៃការប្រគំតន្រី្តដ៏អស្ចារ្យមួយនេះ គឺនឹងដាក់លក់ក្នុងពេលឆាប់ៗនេះ៕