បងប្អូនល្អ! MC Sky លើកទឹកចិត្ត ឌីជេ ឡាយអ៊ិន ឱ្យសាងកិត្តិយសជាថ្មី ក្រោយមានសេរីភាពវិញ

ទស្សនិកជនដែលស្រឡាញ់គាំទ្រវិស័យសិល្បៈភាគច្រើនប្រាកដជានៅចាំលោក ហែម បូរិទ្ធ ហៅ ឌីជេ ឡាយអ៊ិន ដែលធ្លាប់ជាពិធីករដ៏មានប្រជាប្រិយភាពមួយរូបមិនខាន ដោយកាលពីចុងឆ្នាំ ២០១៨ កន្លងទៅ លោកត្រូវបានសមត្ថកិច្ចចាប់ខ្លួនសង្ស័យពាក់ព័ន្ធនឹងករណីជួញដូរគ្រឿងញៀន និង រក្សាទុកអាវុធខុសច្បាស់។

ខណៈបាត់មុខអស់រយៈពេលជិត ៣ ឆ្នាំ ស្រាប់តែនៅថ្ងៃទី ២៥ ខែកក្កដា ឆ្នាំ ២០២២ កន្លងទៅ ឌីជេ ឡាយអ៊ិន បានបង្ហាញមុខជាថ្មីនៅលើបណ្ដាញសង្គមហ្វេសប៊ុកផ្ទាល់ខ្លួន ដោយត្រឡប់មកលើកនេះ ឌីជេ ឡាយអ៊ិន បានប្រកាសដឹងកំហុស និង បានសុំការអភ័យទោសពីសំណាក់ទស្សនិកជន ព្រោះថាលោកនៅមានកូន ៣ នាក់ទៀតជាកម្លាំងចិត្ត ហើយពួកគេក៏សូមឱ្យលោកក្រោកឡើងតស៊ូកសាងកិត្តិយសឡើងវិញ។

ថ្មីៗនេះ ពិធីករ ស្កាយ (MC Sky) ដែលគេស្គាល់ជាប្អូនប្រុសរបស់ ឌីជេ ឡាយអ៊ិន បានបង្ហោះសារជូនពរថ្ងៃកំណើតបងប្រុសជាទីស្រឡាញ់យ៉ាងមានអត្ថន័យបំផុត ដែលធ្វើឱ្យមហាជនរំភើបជំនួសទំនាក់ទំនងបងប្អូនអ្នកទាំងពីរមិនស្ទើរនោះទេ។

ពិធីករ ស្កាយ បានរៀបរាប់ទាំងក្ដុកក្ដួលថា ៖ «រីករាយថ្ងៃកំណើត បងប្រុសដ៏រឹងមាំរបស់ខ្ញុំ ជូនពរបងឱ្យផុតគ្រោះចង្រៃផ្សេងៗទាំងអស់ ហើយជួបវិញនូវភាពរីកចម្រើន ជាមួយការតាំងចិត្តថ្មី ក្តីសង្ឃឹមថ្មី ការខិតខំកសាងកិត្តិយសថ្មីឡើងវិញបានដោយជោគជ័យ»៕