Bright ផុសសារព្រមានមិនចាំស្អែក ក្រោយអ្នកគាំទ្រប្រាប់ថាមានគេលួចធ្វើរឿងនេះដាក់ខ្លួន

កាលពីពេលថ្មីៗនេះ មហាជនអ្នកគាំទ្រមានការភ្ញាក់ផ្អើលជាខ្លាំង បន្ទាប់ពីតារាប្រុសរូបសង្ហា Bright Norr បានចេញមកបង្ហោះសារបែបព្រមានទៅកាន់បុគ្គលិកហាងលក់ទំនិញមួយកន្លែង ដែលហាក់បានធ្វើសកម្មភាពមួយនាំឱ្យប៉ះពាល់ដល់លោក ក្រោយការជូនដំណឹងពីអ្នកគាំទ្រ។

តាមរយៈសារបង្ហោះនោះ អ្នកកំលោះរូបសង្ហា Bright បានសរសេរថា ៖ «ទុកពេលឱ្យបុគ្គលិកហាងលក់ទំនិញមួយដឹងខ្លួនសិន អរគុណអ្នកគាំទ្រដែលដែលយល់ចិត្ត ពិតជាមានសំណាងណាស់ដែលមានអ្នកគាំទ្រល្អដូចនេះ»។ ទន្ទឹមនឹងឃើញការបង្ហោះសារបែបនេះ គេក៏ឃើញមានអ្នកគាំទ្រមួយចំនួនធំបានចូលទៅបញ្ចេញមតិសាកសួរ និង បង្ហាញការបារម្ភ។

ពាក់ព័ន្ធជាមួយរឿងរ៉ាវនៃបុគ្គលិកហាងនោះ បើតាមអ្នកគាំទ្រដែលបានឃើញ និង ដឹងរឿង ក៏បានចូលទៅបញ្ចេញមតិថា មានបុគ្គលិកហាងមួយកន្លែងបានលួចថតតារាប្រុស Bright ហើយយកទៅបង្ហោះដោយបានបញ្ចេញមតិមិនគប្បីនាំឱ្យប៉ះពាល់ដល់តារាប្រុស Bright។ យ៉ាងណាមិញ នេះគ្រាន់តែការចូលរួមមតិពីមហាជនប៉ុណ្ណោះ សម្រាប់រឿងពិតកើតឡើងយ៉ាងណានោះមានតែរង់ចាំការបកស្រាយពីតារាប្រុស Bright ផ្ទាល់៕