ក្តុកក្តួល! ណាន វីសារ ទម្លាយអតីតកាលដ៏ជូរចត់ ធ្លាប់ជាកម្មករសំណង់ជាមួយម្តាយ នៅប្រទេសថៃ

មហាជនតាមដានកម្មវិធីប្រឡងចម្រៀងលំដាប់ថ្នាក់ពិភពលោក Cambodian Idol រដូវកាលទី ៤ ច្បាស់ជាបានស្គាល់បេក្ខភាព ណាន វីសារ ជាបេក្ខភាពមួយរូបលេចធ្លោខ្លាំងណាស់ដែរក្នុងចំណោមបេក្ខភាពផ្សេងទៀត។ ក្នុងនោះ បេក្ខជន ណាន វីសារ ត្រូវបានគណៈកម្មការទាំង ៤ មូលមតិគ្នាសម្រេច Save រូបគេឱ្យនៅបន្តក្នុងកម្មវិធីកាលពីវគ្គ Live Show សប្ដាហ៍ទី ៤ រាត្រីថ្ងៃទី ៧ ខែសីហា ឆ្នាំ ២០២២ ទៀតផង។

ដោយឡែក មុននឹងឈានជើងចូលប្រកួតក្នុងកម្មវិធីលំដាបថ្នាក់ពិភពលោកនេះដែរ លោក ណាន វីសារ ក៏ត្រូវបានគេដឹងថា លោកក៏មានអាជីពជាតារាបង្ហាញម៉ូដ ដែលទទួលបានប្រជាប្រិយភាពគួរសម។

ស្របពេលកំពុងប្រឡូកក្នុងសិល្បៈនេះ អាចនឹងមានមហាជនអ្នកគាំទ្រតិចណាស់ ដែលធ្លាប់បានដឹងនូវរឿងរ៉ាវជូរចត់នៃជីវិតរបស់លោក ណាន វីសារ ដោយកាលពីថ្ងៃទី ១២ ខែសីហា ឆ្នាំ ២០២២ នេះ លោកបានបង្ហោះរូបភាពជាមួយនឹងអ្នកម្តាយជាទីស្រឡាញ់ ដោយអមនូវសាររៀបរាប់ពីជីវិតកាលខ្លួន និង ម្តាយជាកម្មករសំណង់នៅឯប្រទេសថៃ។

សារនោះ លោក ណាន វីសារ បានរៀបរាប់ថា ៖ «អរគុណការលំបាក ភាពក្រវេទនា ដែលធ្វើឱ្យខ្ញុំរឹងមាំបាននៅថ្ងៃនេះ។ ឃើញរូបមួយសន្លឹកនេះ កូនពិតជារំជួលចិត្ត ហើយមានមោទកភាពណាស់ ដែលកើតជាកូនម៉ាក់ នារីដ៏រឹងមាំរបស់កូន។ ម៉ាក់លះបង់ច្រើនណាស់សម្រាប់ជីវិតរបស់ពួកកូន។ ឱ្យកូនសុំមើលថែម៉ាក់វិញម្តងណាម៉ាក់ កូនមិនឱ្យម៉ាក់ហត់ទៀតទេ។ រូបនេះមើលពេលណា ក៏កូនចង់ស្រក់ទឹកភ្នែកដែរ ម៉ាក់ទើបមានសេរីភាពមិនដល់ ១ ខែស្រួលបួលផង ម៉ាក់ក៏មកធ្វើសំណង់ជាមួយកូនទៀត។ រំឭកអនុស្សារីយ៍ពេលធ្វើសំណង់ជាមួយអ្នកម្តាយនៅប្រទេសថៃ សម្រាប់កូនម៉ាក់តែងតែស្រស់ស្អាតជានិច្ច! ទម្រាំមកដល់ពេលនេះវាមិនមែនជារឿងងាយស្រួលទេ គ្រប់យ៉ាងកើតចេញពីលម្ហនៃការដឹងគុណ»។

ក្រោយមហាជនបានអានសារនោះហើយ ម្នាក់ៗក៏លាន់មាត់សរសើរពីទឹកចិត្តដឹងគុណ កតញ្ញូ ដ៏ធំធេងរបសលោក ណាន វីសារ ចំពោះអ្នកម្តាយ ជាពិសេសនោះគឺការតស៊ូទម្រាំមានថ្ងៃនេះរបស់លោក៕