ស្រឡាញ់គ្នាមក ៦ ឆ្នាំ ទីបំផុត Golf ទម្លាយរឿងរៀបការហើយ

អស់រយៈពេល ៦ ឆ្នាំមកហើយ ដែលតារាសម្ដែងប្រុសលោក Golf Anuwat និង សង្សារក្រៅរង្វង់សិល្បៈនាង Piwadee មានទំនាក់ទំនងគ្នានោះ។ កន្លងមកនេះមហាជនតែងបានឃើញគូស្នេហ៍លោក Golf តែងបង្ហាញភាពស្និទ្ធស្នាលជាមួយគ្នា រហូតនាំឱ្យចង់ឃើញអ្នកទាំងពីរកាន់ដៃគ្នារៀបការថែមទៀតផង។

ថ្មីៗនេះ តារាប្រុស Golf បានកាន់ដៃសង្សារទៅជួបឪពុកម្តាយទាំងសងខាង ថែមទាំងបានសុំភ្ជាប់សាច់ភ្ជាប់ឈាមជាគូស្នេហាដែលមានការដឹងឬពីចាស់ទុំទៀតផង។ អ្វីដែលសំខាន់តារាប្រុសរូបនេះក៏សុំសង្សាររៀបការស្ងាត់រួចហើយដូចគ្នា។ ជាមួយគ្នានោះ បើនិយាយពីពេលវេលារៀបការវិញ ទម្លាយក្នុងកម្មវិធី Club Friday The Series 14 Love & Belief តារាប្រុស Golf បានបង្ហើបថា នៅឆ្នាំក្រោយ ឬ អាចនឹងចុងឆ្នាំនេះលោកនឹងសង្សារព្រមព្រៀងគ្នាចូលរោងការជាផ្លូវការហើយ។

ជាមួយនឹងដំណឹងនេះ ពិតធ្វើឱ្យមហាជនអ្នកគាំទ្ររំភើបចិត្តជាខ្លាំង ដោយហេតុថាម្នាក់រង់ចាំចង់ឃើញគូស្នេហ៍តារាប្រុស Golf រៀបការមកយូរហើយ។ ណាមួយតារាប្រុស Golf និង សង្សារក៏ជាគូស្នេហ៍មួយដែលបានមើលចិត្តមើលថ្លើមគ្នាមកសមល្មមដូចគ្នា ហាក់ដែលដល់ពេលដែលអ្នកទាំងពីរកាន់ដៃគ្នាសាងគ្រួសារហើយ៕