បេក្ខភាព Cambodian Idol ២ រូប មានឥទ្ធិពលធ្វើឱ្យ កែវ សុបញ្ញា ហៅថា Idol ពេញៗមាត់
កាលពីរាត្រីវគ្គ Live Show សប្ដាហ៍ទី ៥ នៃកម្មវីធីប្រឡងចម្រៀងលំដាប់ពិភពលោក Cambodian Idol រដូវកាលទី ៤ កាលពីថ្ងៃ ១៤ ខែសីហា ឆ្នាំ ២០២២ កន្លងទៅ បានធ្វើឱ្យទស្សនិកជនស្រែកហ៊ោកញ្ជ្រៀវកងរំពងពេកឆាកពេលបេក្ខជននីមួយៗឡើងមកបញ្ចេញសមត្ថភាពម្ដងៗ។
លើសពីនោះ គឺការបង្ហាញទស្សនីយភាពដ៏អស្ចារ្យនៃការវេញត្របាញ់នូវឧបករណ៍តន្ត្រីបុរាណ និង តន្ត្រីសម័យ ក្នុងការសម្តែងរបស់បេក្ខភាពនីមួយៗ រហូតធ្វើឱ្យអ្នកលេងបណ្តាញសង្គមហ្វេសប៊ុកជាច្រើន បានចែករំលែកនូវវីដេអូ និង រូបភាពក្នុងកម្មវិធីជាបន្តបន្ទាប់ថែមទៀតផង។
ក្រឡេកទៅមើលបេក្ខភាព ដែលលេចធ្លោក្នុងសប្តាហ៍នេះវិញ គឺមិនខុសពីសប្តាហ៍មុនៗនោះឡើយ បើទោះជាបេក្ខភាពខ្លះត្រូវបានជម្រុះចេញក្តី តែក្នុងចំណោមនោះ បេក្ខជន ២ រមែងត្រូវបានមហាជនគាំទ្រខ្លាំងបំផុតនោះ គឺ លឹម តិចម៉េង និង ថុល សុភិទិ ក៏នៅអាចបន្តទៅកាន់សប្តាហ៍ក្រោយបានដូចដើម។
ជាការពិតណាស់ បេក្ខជន លឹម តិចម៉េង និង ថុល សុភិទិ មិនត្រឹមតែទទួលបានការគាំទ្រពីសំណាក់មហាជននោះឡើយ គឺសូម្បីតារាចម្រៀងរៀមច្បងជាច្រើនក៏បានគាំទ្រ និង សង្ឃឹមថាអ្នកទាំង ២ នឹងក្លាយទៅជា Top 2 ជាក់ជាមិនខាន។
ជាក់ស្តែងក្នុងចំណោមសិល្បករ-ការិនី ដែលបានគាំទ្រដល់បេក្ខជន លឹម តិចម៉េង និង ថុល សុភិទិ ក៏មានកញ្ញា កែវ សុបញ្ញា ដែលជាតារាចម្រៀងប្រចាំផលិតកម្មរស្មីហង្សមាស ក៏ជាអ្នកគាំទ្រ និង ចាត់ទុកបេក្ខភាពទាំង ២ រូប ជា Idol របស់នាងទៀតផង។ ក្នុងនោះ កញ្ញា កែវ សុបញ្ញា ហាក់មិនលាក់លៀម និយាយចំៗថា ខ្លួនគេងលក់ស្រួលបន្ទាប់ពី លឹម តិចម៉េង និង ថុល សុភិទិ អាចបន្តទៅកាន់វគ្គ Live Show សប្តាហ៍ទី ៦ បាន៕
រូបភាព៖ Two 4 Photographs
