ផ្អាកសិល្បៈជាង ៣ ឆ្នាំ ពេលនេះ Hyun Bin ត្រៀមត្រឡប់មកធ្វើឱ្យអ្នកគាំទ្ររំជួលបេះដូងវិញហើយ
តារាប្រុស Hyun Bin ជាតារាសម្តែងជើងចាស់ម្នាក់ដែលរក្សាបានប្រជាប្រិយភាពមិនតិចនោះទេ ក្នុងអារម្មណ៍បេះដូងមហាជនអ្នកគាំទ្រ ព្រោះតែសម្រស់ដ៏ស្រស់សង្ហាតាមបែបប្រុសចាស់ ក៏ដូចជាសមត្ថភាពសម្តែងយ៉ាងល្អរបស់លោកផងដែរ។
យ៉ាងណាមិញ បើនិយាយដល់រឿងជីវិតផ្ទាល់ខ្លួនវិញ តារាប្រុសរូបនេះបានរៀបការសាងគ្រួសារជាមួយនឹងសង្សារតារាស្រី Son Ye Jin រួចទៅហើយ កាលពីថ្ងៃទី ៣១ ខែមីនា ឆ្នាំ ២០២២ កន្លងទៅនេះ ដោយមានការចូលរួមពីសំណាក់មហាជនជាច្រើន ហើយក្រោយពីនោះមិនបានប៉ុន្មាន ពួកគេក៏បានប្រកាសពីការមានកំណើតរបស់កូនដំបូងរបស់ខ្លួនផងដែរ។
ដោយឡែក បើគិតមើលទៅមកទល់ពេលនេះ គឺមានរយៈពេលជាង ៣ ឆ្នាំទៅហើយ ដែល Hyun Bin បានឃ្លាតឆ្ងាយពីវិស័យសិល្បៈ ដោយរឿងចុងក្រោយដែលលោកបានសម្តែង គឺរឿងភាគ Crush Landing on You ដែលបានដើរជាតួឯកប្រុស ជាមួយនឹងភរិយាសំណព្វចិត្ត Ye Jin នោះឯង។
ការផ្អាកពីសិល្បៈរបស់តារាប្រុសរូបនេះ គឺពិតជាធ្វើឱ្យមហាជនអ្នកគាំទ្រនឹកនារូបលោកមិនតិចនោះដែរ តែក៏សប្បាយចិត្តដែលលោកបានប្រើប្រាស់ពេលវេលាទាំងនេះជាមួយនឹង Ye Jin ហើយក៏បានរៀបការជាមួយគ្នាមានសុភមង្គលរហូតមកដល់សព្វថ្ងៃនេះ។
ដោយឡែក ថ្មីៗនេះ បើតាមព័ត៌មានបានឱ្យដឹងថា តារាប្រុស Hyun Bin ក៏បានត្រឡប់មកក្នុងវិស័យសិល្បៈវិញហើយ ដោយលោកបានត្រៀមលេចមុននៅក្នុងខែ្សភាពយន្តមួយរឿង មានឈ្មោះថា «Confidential Assignment 2»។
ក្នុងនោះ លោកបានបញ្ចប់ការសម្តែងខ្សែភាពយន្តរឿងនេះរួចរាល់ទៅហើយ ហើយវាក៏នឹងត្រូវចាក់ផ្សាយនៅ ៣ សប្តាហ៍ខាងមុខនេះផងដែរ។ គេក៏បានឱ្យដឹងទៀតថា Hyun Bin នឹងមានការមមាញឹកខ្លាំងណាស់ ជាមួយនឹងការត្រឡប់មកវិញលើកនេះ ដោយត្រូវមានការសម្ភាស និង ការងារសិល្បៈជាច្រើនបន្តបន្ទាប់គ្នាទៀតផង។ យ៉ាងណាមិញ មហាជនអ្នកគាំទ្រពិតជាសប្បាយចិត្តមិនតិចឡើយ ហើយក៏សង្ឃឹមថា លោកនឹងបន្តលេចមុខនៅក្នុងរឿងភាគជាបន្តបន្ទាប់ផងដែរ៕
