មុនថ្ងៃប្រឡងពាក់កណ្ដាលផ្ដាច់ព្រ័ត្រ ស៊ឹម ច័ន្ទពន្លឺ ទម្លាយអារម្មណ៍នេះឡើងភ្លែត

ពិតណាស់ក្រោយពីធ្វើការប្រឡងប្រជែងជម្រុះចម្រាញ់ជាច្រើនសប្ដាហ៍កន្លងទៅ ពេលនេះកម្មវិធីប្រឡងចម្រៀងលំដាប់ពិភពលោក Cambodian idol រដូវកាលទី ៤​ បានឈានដល់វគ្គពាក់កណ្ដាលផ្ដាច់ព្រ័ត្រនាពេលខាងមុខហើយ ដែលកាន់តែកៀកវេលាកម្មវិធីនឹងស្វែងរកឃើញម្ចាស់ពានប្រចាំកម្មវិធីក្នុងរដូវកាលថ្មីនេះ។

ដោយឡែក ក្រឡេកទៅចាប់អារម្មណ៍បេក្ខភាព ស៊ឹម ច័ន្ទពន្លឺ ដែលជាបេក្ខភាពដ៏ឆ្នើមមួយរូបក្នុងចំណោមបេក្ខភាពជើងខ្លាំងទាំង ៦ ដែលបានឈានទៅវគ្គពាក់កណ្ដាលផ្ដាច់ព្រ័ត្រនៃកម្មវិធី ឃើញថាកាន់តែកៀកថ្ងៃប្រឡង បេក្ខភាពរូបនេះបានបង្ហោះសារបង្ហាញអារម្មណ៍រំភើបចិត្ត និង បង្ហាញការត្រៀមខ្លួនសម្រាប់ការប្រកួតសប្ដាហ៍នេះផងដែរ។

ក្នុងនោះ ស៊ឹម ច័ន្ទពន្លឺ បានសរសេររៀបរាប់ថា ៖ «ពិតជារំភើប… ព្រោះវគ្គពាក់កណ្តាលផ្តាច់ព្រ័ត្រ កាន់តែជិតឈានចូលមកដល់! សូមថ្លែងអំណរគុណជាខ្លាំង ដល់ពុកម៉ែ បងប្អូន ទស្សនិកជន… ដែលបានផ្ញើសារគាំទ្រដល់រូបខ្ញុំបាទ… ខ្ញុំបាទនឹងខិតខំរិះរកនូវទស្សនីយភាពថ្មីប្លែកបន្តទៀត… សង្ឃឹមថា បងប្អូននៅតែបន្តគាំទ្រ និង ផ្ញើសារបោះឆ្នោតដល់រូបខ្ញុំបាទបន្តទៀត! សូមអរគុណ ..!»។

ទន្ទឹមនឹងនោះ មហាជន ក៏ដូចជាអ្នកគាំទ្ររបស់បេក្ខភាពរូបនេះ បានធ្វើការបញ្ចេញមតិបង្ហាញការគាំទ្រលើកទឹកចិត្ត ព្រមទាំងជូនពរដល់លោកក្នុងការប្រឡងប្រជែងខាងមុខនេះផងដែរ៕