រំសាយក្រុមជាង ១០ ឆ្នាំ សមាជិក MKS ទាំង ៤ ម្នាក់ៗប្រើជីវិតឯកជនផ្សេងៗគ្នា

បើរំឮកកាលពីប្រមាណជា ២០ ឆ្នាំមុន ស្រទាប់យុវវ័យកាលពីជំនាន់ឆ្នាំ ២០០០ ប្រាកដជាបានស្គាល់ហើយក្រុមតារាចម្រៀងពេញនិយម MKS ដែលទទួលបានប្រជាប្រិយភាពយ៉ាងខ្លាំងក្នុងវិស័យសិល្បៈ។

កាលនោះក្រុមចម្រៀង MKS ជាក្រុមចម្រៀងដំបូងក្នុងប្រទេសកម្ពុជា ដែលមានភាពល្បីល្បាញ និង ពេញនិយមយ៉ាងខ្លាំង ពោលបទចម្រៀងគ្រប់បទរបស់ក្រុម MKS ទទួលបានការគាំទ្រយ៉ាងខ្លាំងពីមហាជន ដូចជាបទ «ជាសិទ្ធរបស់អូន» បទ «ស្លៀកពាក់តាមក្បួនតម្រា» បទ «គង់មានថ្ងៃណាមួយ» បទ «សូលីដាកំពូលស្នេហ៍» និង បទ «ប្រកែកប្រកាន់» ជាដើម ។

ក្រោយសាងកេរ្តិ៍ឈ្មោះប្រមាណជិត ១០ ឆ្នាំ ក្រុមចម្រៀង MKS ដែលមានសមាជិក ៤ ដូចជា លោក ហេង ពិទូ លោក វណ្ណា ពិសិដ្ឋ លោក ម៉ិញ បញ្ញាសុទ្ធ និង លោក ហេង សុភី ជាដើម ក៏បានរំសាយក្រុម ដោយគិតមកទល់ពេលនេះគឺរយៈពេលប្រមាណជាង ១០ ឆ្នាំ ហើយ ហើយក្នុងនោះសមាជិកម្នាក់ៗខ្លះក៏នៅបន្តអាជីពជាតារាចម្រៀង ខ្លះទៀតក្លាយជាអ្នកនិពន្ធ និង ផលិតករផងដែរ។

១. លោក ហេង ពិទូ

ក្រោយរំសាយក្រុមចម្រៀង MKS លោក ហេង ពិទូ នៅតែបន្តអាជីពជាតារាចម្រៀងដូចដើម រហូតមកដល់ពេលបច្ចុប្បន្ន។

២. លោក វណ្ណា ពិសិដ្ឋ

លោក វណ្ណា ពិសិដ្ឋ ក៏នៅបន្តអាជីពជាតារាចម្រៀងទោល នៅក្នុងផលិតកម្ម M ក្រោយរំសាយពីក្រុម MKS តែប៉ុន្មានឆ្នាំចុងក្រោយនេះ លោកក៏ហាក់ស្ងប់ស្ងាត់លើអាជីពជាតារាចម្រៀង ដោយលោកមានការងារជាមន្ត្រីរាជការ។​ សព្វថ្ងៃលោក វណ្ណា ពិសិដ្ឋ រៀបការ និង ទទួលបានចំណងដៃកូនស្រីម្នាក់ហើយដែរ។

៣. លោក ម៉ិញ បញ្ញាសុត

លោក ម៉ិញ បញ្ញាសុត កូនប្រុសច្បងរបស់លោក ម៉ិញ សុធីវណ្ណ ក្រោយពីរំសាយក្រុម MKS លោកក៏បានសាងគ្រួសារយ៉ាងមានសុភមង្គល ដោយលោកបានរៀបការតាំងពីឆ្នាំ ២០០៣ មកម្ល៉េះ។ សព្វថ្ងៃលោក ម៉ិញ បញ្ញាសុត មានកូនស្រី ២ នាក់ និង ប្រុស ១​ នាក់។ សព្វថ្ងៃ លោកគឺជាអ្នកនិពន្ធទំនុកភ្លេងផងដែរ។

៤. លោក ហេង សុភី
លោក ហេង សុភី ក៏ហាក់ស្ងប់ស្ងាត់លើអាជីពជាតារាចម្រៀងភ្លាមៗដែរ ក្រោយពីក្រុម MKS បានរំសាយ។ លោក ហេង សុភី ក៏បានក្លាយទៅជាអ្នកផលិតកម្មវិធីទូរស្សន៍ ក្នុងកម្មវិធីល្បីៗជាច្រើនរបស់ស្ថានីយទូរទស្សន៍បាយ័នជាច្រើនឆ្នាំហើយដែរ។ សព្វថ្ងៃលោកបានរៀបការ និង ទទួលបានចំណងដៃកូនស្រី ១ រូប ហើយដែរ៕