ត្រឹមរយៈពេលខ្លី ក្រុម La Cima កំពុងផ្ទុះខ្លាំងលើវិស័យចម្រៀងរ៉េប
មហាជននិយមចូលចិត្តបទចម្រៀងរ៉េប ហ៊ីបហ៊ប ច្បាស់ជាបានស្គាល់ហើយ La Cima ជាក្រុមចម្រៀងរ៉េប ស្ថិតនៅក្នុងផលិតកម្ម La Cima Cartel ដែលស្ថិតនៅជាមួយគ្រួសារផលិតកម្មបារមី (Sub Label) កំពុងមានសន្ទុះក្នុងការគាំទ្រយ៉ាងខ្លាំងពីសំណាក់យុវវ័យ។ ក្រុម La Cima និង ផលិតកម្ម La Cima Cartel ត្រូវបានរកឃើញ និង បង្កើតឡើងដោយសិល្បករផលិតកម្មបារមី ២ រូប គឺ RXTHY និង Songha – សង្ហា ។
ជាការពិតណាស់ ក្រុម La Cima ទើបតែបង្កើតឡើងត្រឹមរយៈពេលខ្លី ពោលគឺជាង ១ ឆ្នាំ បើធៀបនឹងក្រុមតារាចម្រៀងរ៉េបផ្សេងទៀតរបស់កម្ពុជា តែក្រុមចម្រៀងរ៉េបមានសមាជិកចំនួន ៦ នាក់ កំពុងតែផ្ទុះការគាំទ្រយ៉ាងខ្លាំង ដោយក្នុងនោះបទចម្រៀងរបស់ក្រុមនេះ កំពុងតែកក្រើកខ្លាំងលើបណ្តាញសង្គម Tik Tok តែម្តង។
ក្នុងនោះ បទចម្រៀងល្បីៗជាច្រើនរបស់ La Cima មានដូចជាបទ «ធុងបាសចុងភូមិ» បទ «នារី Sexy» និង បទ «Who Ride with Us» ជាដើម។ លើសពីនោះ La Cima ក៏មានច្រៀងរួមគ្នានឹងតារាចម្រៀងរ៉េបល្បីឈ្មោះ វណ្ណដា ដូចជាបទ «La Cima Night» និង បទ «Back In The Day»។
គួរឱ្យដឹងថា ក្រុម La Cima មានសមាជិកចំនួន ៦ នាក់ រួមមាន លោក Tomie លោក Hasha លោក Meezy លោក Dizzy លោក All3rgy និង លោក Rakhie។ ក្រុមចម្រៀងរ៉េបនេះដែរ បើទោះជាបានផលិតចម្រៀងថ្មីបែប រ៉េប និង ហ៊ីបហ៊ប ក៏ពិតមែន ប៉ុន្តែរាល់បទចម្រៀងនីមួយៗ តែងត្រូវបានប្រគំតន្ត្រីឡើង ដោយរួមបញ្ជូលនូវឧបករណ៍តន្ត្រីបុរាណ ដែលជាចំណុចពិសេសធ្វើឱ្យក្រុមចម្រៀងរ៉េបនេះ ឆក់បានចិត្តអ្នកគាំទ្រក្នុងរយៈពេលខ្លី៕
