Kwan បញ្ចេញភស្តុតាងវីដេអូកាមេរ៉ាសុវត្ថិភាពច្បាស់ៗ ក្រោយគេសង្ស័យបង្ខំធ្វើបាបលើឈ្នួល

ថ្មីៗនេះ ពិតជាមានការផ្ទុះផ្អើលនៅក្នុងសិល្បៈថៃជាថ្មី ដោយមានប្រភពមួយចេញមកទម្លាយថា មានតារាម្នាក់មានអត្តចរិតមិនល្អបានបង្ខំប្រើប្រាស់ឈ្នួលហួសកម្លាំង​ ហើយថែមទាំងបង្ខំឱ្យបាយទឹកចានជាមួយសត្វឆ្កែទៀតផង ពិតជាទង្វើដែលពិបាកទទួលយកណាស់។

ក្នុងនោះពេលនេះតារាស្រី Kwan Usamanee ជាជនម្នាក់ ដែលកំពុងតែត្រូវគេសង្ស័យយ៉ាងខ្លាំងជាងគេនៅក្នុងរឿងនេះផងដែរ ព្រោះតែថ្មីៗនេះនាងទើបតែប្រកាសរកអ្នកមកជួយចិញ្ចឹមឆ្កែទាំង ១២ ក្បាលរបស់ខ្លួន។ យ៉ាងណាមិញ ក្រោយពីត្រូវមហាជនព្រួតសង្ស័យ និង រិះគន់ជាពាក្យពេចន៍ផ្សេងៗ តារាស្រី Kwan Usamanee ក៏បានចេញមុខមកបកស្រាយជាមួយសារព័ត៌មានរួចហើយផងដែរ។ ជាមួយនឹងសារព័ត៌មាន នាងបានឱ្យដឹងថា វាពិតជាគ្មានរឿងដូចគេចោទប្រកាន់នោះទេ​ នាងមិនបានប្រព្រឹត្តបែបនេះឡើយ។ នាងទើបតែដកឈ្នួលពីរនាក់ទៅពិតមែន ព្រោះតែគេធ្វើឱ្យឆ្កែនាងប៊ិះស្លាប់ ប៉ុន្តែនាងមិនបានធ្វើដល់ថ្នាក់ដូចដែលគេបានទម្លាយឡើយ។

យ៉ាងណាមិញ នៅថ្ងៃទី ៨ ខែកញ្ញា ឆ្នាំ ២០២២ នេះ Kwan ក៏បានចេញមុខមកទម្លាយវីដេអូកាមេរ៉ាសុវត្ថិភាពផ្ទះរបស់ខ្លួនដោយផ្ទាល់ ព្រមជាមួយនឹងការបកស្រាយជាហូរហែម្តងទៀត។ នាងបានឱ្យដឹងថា ក្នុងនោះនាងមានឆ្កែមួយក្បាលអាយុជាង ២០ ឆ្នាំ មានជំងឺជរាទ្រុឌទ្រោមខ្លាំង ធ្វើអ្វីដោយខ្លួនឯងមិនបានឡើយ ទើបនាងត្រូវរកមនុស្សមកជួយមើល។

ហើយនាងបន្តទៀតថា កាលដែលអតីតឈ្នួលនោះបានអះអាងថា បានដេកតែមួយម៉ោងនោះ នាងសូមឱ្យមើលនៅក្នុងវីដេអូដោយខ្លួនឯង។ ចំណែករឿងអះអាងថា បាយទឹកចានជាមួយឆ្កែនោះ នាងក៏សុំឱ្យមហាជនពិចារណាផងដែរថា តើមានអ្នកណាដែលសុខចិត្តឱ្យគេធ្វើបែបនេះដាក់នោះ។

លើសពីនេះទៅទៀត ខណៈដែលនាង និង ម្តាយត្រូវចុះទៅតាមខេត្តឆ្កែត្រូវចូលមន្ទីរពេទ្យ​ ហើយឈ្នួលរូបនេះគ្រាន់តែបញ្ចូនឆ្កែឡើងឡានពេទ្យរួច ក៏ចូលទៅដេកវិញបាត់ ទាំងដែលដឹងថាឆ្កែទន់ខ្សោយខ្លាំងជួយខ្លួនឯងមិនបាន។ ឈ្នួលរូបនេះ ក៏ថែមថតរូបខ្លួននៅផ្ទះរបស់នាង ហើយផុសនៅបណ្តាញសង្គមដូចជាផ្ទះខ្លួនឯង ហើយថែមទាំងជេរឆ្កែផ្សេងៗរបស់នាងទៀត។

ចំណែករឿងលុយប្រាក់ខែ គឺមានការយល់ព្រមគ្នាជាមុន ព្រមទាំងផ្អែកទៅលើប្រសិទ្ធភាពនៃការងារ។ ចុងក្រោយ នាងបញ្ចប់ដោយនិយាយទៅកាន់អតីតឈ្នួលថា ហេតុអ្វីមិនយកពេលទៅអភិវឌ្ឍខ្លួនឯង ជៀសជាងមកបង្កើតរឿងរ៉ាវទាក់ទាញចំណាប់អារម្មណ៍បែបនេះ ហើយនេះគឺជាលើកទីមួយ ក៏ដូចជាលើកចុងក្រោយ ដែលនាងបកស្រាយរឿងនេះទីនេះដូចគ្នា៕