មហាជនភាំង ពេលឃើញ Billkin និង PP-Krit ស្រក់ទឹកភ្នែក យំឱបគ្នាលើឆាកតន្ត្រី
ប្រិយមិត្តច្បាស់ស្គាល់ជាក់ជាពុំខានតារាចម្រៀងសាច់សខ្ចីដូចបណ្ដូលចេក លោក PP-Kritt ដែលជាតារាចម្រៀងប្រុសម្នាក់កំពុងតែទទួលបានការគាំទ្រពីសំណាក់យុវ័យសម័យថ្មី។ គេសង្កេតឃើញថា ចាប់តាំងតារាប្រុសរូបនេះសម្ដែងក្នុងសាច់រឿងបុរសស្រឡាញ់បុរសជាមួយតារាប្រុស Billkin មក ហាក់មានសន្ទុះការគាំទ្រខ្លាំងពីសំណាក់ហ្វេនៗក្នុង និង ក្រៅប្រទេស។
តារាសម្ដែងប្រុស PP-Kritt ក្រោយពីបានសម្តែងរួមគ្នាជាមួយ Billkin មកមហាជនតែងបាន Ship ពួកគេទាំងពីរឱ្យមានស្នេហាក្រៅឆាកនឹងគ្នាពិតប្រាកដ ដោយហេតុថា កន្លងមក តារាប្រុសវ័យក្មេង ២ ដួងនេះតែងតែស្និទ្ធស្នាលគ្នា ទៅណាមកណាបណ្ដើរគ្នាត្រសង និង តែងមានរូបភាពរ៉ូមែនទិកមករហូត ដល់ថ្នាក់មហាជនខ្លះនិយាយថាអ្នកទាំងពីរក្លាយជាសង្សារគ្នាស្ងាត់ៗទៀតផង។
ដ្បិតមិនបានសារភាពពេញៗមាត់ថាជាគូសង្សារនឹងគ្នាក៏ពិតមែន តែមហាជនអ្នកគាំទ្រក៏ដឹងក្នុងចិត្តស្រាប់ហើយថាទំនាក់ទំនងរវាងតារាប្រុស PP-Krit និង Billkin ជាអ្វីនោះ។ យ៉ាងណាមិញ កាលពីថ្ងៃទី ០៨ ខែតុលា ឆ្នាំ២០២២ កន្លងទៅតារាប្រុសទាំងពីរបានធ្វើឱ្យមហាជនរំភើបចិត្តជាខ្លាំងដោយ នៅថ្ងៃទី ០៨ នោះ តារាប្រុស Billkin បានរៀបចំពិធី Fan Meeting ហើយចំថ្ងៃខួបកំណើតលោកផងដែរ។
អ្វីដែលរឹតពិសេស តារាប្រុស PP-Krit បាន Surprise តារាប្រុស Billkin ដោយកាន់នំខេកទៅអបអរលើឆាកតន្ត្រីតែម្តង។ បន្ទាប់ពីឃើញដៃគូសំណព្វចិត្តរៀបចំ Surprise បែបនេះបានធ្វើឱ្យតារាប្រុស Billkin និង PP-Krit រំភើបចិត្តខ្លាំងដល់ថ្នាក់ហូរទឹកភ្នែកមកមិនដឹងខ្លួន ឈរឱបគ្នាដោយក្ដីរីករាយ នាំឱ្យមហាជនអ្នកគាំទ្រស្រែកហ៊ោពេញកម្មវិធី៕
