អ្នកគាំទ្របារម្ភព្រាត ក្រោយ Nadech ប្រាប់ថា Yaya កើតកូវីដ-១៩ ជាលើកទី ២
Nadech-Yaya គូស្នេហ៍តារាថៃលំដាប់ជួរមុខ ដែលធ្វើឱ្យអ្នកគាំទ្រតែងលួចច្រណែន និង អៀនជំនួសរាល់ពេលដែលអ្នកទាំងពីរបញ្ចេញភាពផ្អែមល្ហែមដូចគ្នា ជាពិសេសមានអ្នកគាំទ្រជាច្រើនហាក់ទន្ទឹងរង់ចាំដំណឹងរៀបការរបស់អ្នកទាំងពីរ។
យ៉ាងណាមិញ ថ្មីៗនេះ គូស្នេហ៍មួយគូនេះបានធ្វើឱ្យមហាជនងឿងឆ្ងល់ជាខ្លាំង ក្រោយលេខវត្តមាន Nadech ក្នុងកម្មវិធី Event របស់ Yaya ដោយមិនមែនជាការមកផ្ដល់កម្លាំងចិត្តអ្វីទេ តែមកធ្វើការជំនួស ដោយ Yaya មិនបានមកចូលរួម។
Nadech បានធ្វើការបកស្រាយពីមូលហេតុឱ្យដឹងថា ៖ «ពួកយើងទើបបញ្ចប់ការផ្សាយរឿងភាគថ្មីរបស់ពួកយើង ហើយ Yaya គាត់មានបញ្ហាសុខភាពបាទ ប្អូនបានកើតកូវីដ-១៩ ជាលើកទី ២ ហើយភ្លាមៗគឺមុនថ្ងៃ Event នេះមួយថ្ងៃ តែប្អូនគឺមិនធ្ងន់ធ្ងរអ្វីទេ អាការក៏មិនលំបាកដែរ គ្រាន់តែប្អូនអាចធុញបន្ដិច ព្រោះជាប់នៅផ្ទះចេញក្រៅមិនបាន។ ខ្ញុំក៏បាននិយាយឱ្យកម្លាំងចិត្តនាងដូចគ្នា ហើយចំពោះកម្មវិធីនេះក៏សុំអភ័យដល់ម្ចាស់កម្មវិធី និងអរគុណដែលបានយល់ព្រមឱ្យខ្ញុំមកជំនួស ព្រោះវាបន្ទាន់ពេក អរគុណចំពោះការយោគយល់ពីចាស់ទុំ»។
«ចំពោះអ្នកគាំទ្រ Yaya កុំបារម្ភអីណា ប្អូននឹងជាឆាប់ៗ ហើយត្រលប់មកធ្វើការងាររបស់ប្អូនមិនខាន ពេលនេះអាចនឹងលុបចោលការងារមួយចំនួនតាមតែអាចធ្វើទៅបាន ហើយខ្ញុំ និង ក្រុមការងារក៏បានធ្វើតេស្តដូចគ្នា តែពួកយើងមិនអីទេ។ យ៉ាងណាក៏សូមឱ្យគ្រប់គ្នាផ្ដល់កម្លាំងចិត្តដល់ប្អូនផងណា ជាពិសេសឆ្លៀតពេលនេះផ្ដាំទៅប្អូនថា ខ្ញុំនឹកនាងណាស់បាទ»៕
