ផ្អើលជាថ្មី! Ploy ដាក់ចំៗមិនញញើត រឿងឈប់សម្ដែងរឿងតាមប៉ុស្ដិ៍ទូរស្សន៍ ព្រោះសាច់រឿងដដែលៗគ្មានអ្វីថ្មី
បើនិយាយពីតារាស្រី Ploy Chermarn មហាជនភាគច្រើនមុខជាធ្លាប់បានស្គាល់រួចមកហើយថា នាងជាតារាសម្ដែងជើងចាស់មួយរូបដែលមានបទពិសោធលើវិថីសិល្បៈមកជិត ៣០ ឆ្នាំ ហើយមានស្នាដៃរឿងល្បីៗរាប់មិនអស់។
ថ្មីៗនេះ លេចព័ត៌មានចចាមអារ៉ាមថា Ploy មានគម្រោងលាឈប់ពីសិល្បៈ ក្រោយតារាស្រីរូបនេះបានផ្អាកទទួលការងារថតរឿង ហើយមិនសូវលេចមុខតាមកម្មវិធីផ្សេងៗជាង ២ ឆ្នាំមកហើយ។
ជុំវិញបញ្ហានេះ Ploy ក៏បានចេញមុខបកស្រាយថា ៖ «តាមពិតទៅខ្ញុំមិនបានលាឈប់ពីពិភពសិល្បៈទេ គ្រាន់តែខ្ញុំឈប់សម្ដែងរឿងភាគតាមប៉ុស្តិ៍ទូរទស្សន៍ មិនថាប៉ុស្ដិ៍លេខ ៣, ៥, ៧, ៩ ឬប៉ុស្តិ៍ផ្សេងៗ គឺឈប់ទាំងអស់ តែបើសាច់រឿងជាប្រភេទ Series ខ្លីៗតាមអនឡាញ ឬ អ្វីដែលមានគំនិតប្លែកៗ គឺខ្ញុំនឹងទទួលសម្ដែង»។
«មូលហេតុគឺ ខ្ញុំមិនចង់រស់នៅក្នុងដំណើរជីវិតដដែលៗទេ មិនចង់ធ្វើអ្វីច្រំដែលៗ គឺងាយៗមិនចង់បើកទូរទស្សន៍មកឃើញតែរឿងទះតប់ សូម្បីតែក្នុងបុណ្យសពក៏ឈ្លោះគ្នា ដែលឃើញរូបភាពបែបនេះហើយគឺអស់កម្លាំងចិត្ត។ ខ្ញុំគិតថាបើសិនជាយើងនៅត្រង់នេះដដែល មិនយូរទេអ្នកមើលគាត់នឹងធុញ ហើយក៏លែងត្រូវការខ្ញុំទៀត ព្រោះគាត់ឃើញតែយើងសម្ដែងអ្វីដែលដដែលមិនមានអ្វីប្លែក ចឹងខ្ញុំសម្រេចចិត្តថាដើរចេញមុនចុះ មុនពេលដែលគេលែងត្រូវការ ចេញពេលនេះអ្នកគាំទ្រអាចនៅចងចាំ Ploy ក្នុងរូបភាពល្អ បើពេលគេធុញយើងដើរចេញនោះ វានឹងមិនមានតម្លៃឱ្យគ្រប់គ្នាចងចាំទេ»៕
