មុនក្លាយជាម្ចាស់ពាន I Am A Singer Cambodia ឌី សូនិត្តា ធ្លាប់ឈ្នះពានម្ដងរួចមកហើយនៅឆ្នាំ ២០១៦
នៅរាត្រីថ្ងៃទី ១៩ ខែវិច្ឆិកា ឆ្នាំ ២០២២ កម្មវិធីប្រឡងចម្រៀងដ៏ធំ I Am A Singer Cambodia បានប្រកាសរកឃើញម្ចាស់ជ័យលាភីឈ្នះពានរង្វាន់សម្រាប់រដូវកាលទី ៣ ហើយគឺបានទៅលើតារាចម្រៀង ឌី សូនិត្តា។
ការទទួលជ័យលាភីលេខ ១ ក្នុងការប្រឡង តារាចម្រៀងអាជីពកម្មវិធីលំដាប់ថ្នាក់ពិភពលោកមួយនេះ ឌី សូនិត្តា បានបង្ហាញអារម្មណ៍រំភើបត្រេកអរជាខ្លាំង ក្នុងនោះនាងក៏ទទួលបានការផ្ញើសារ ការបញ្ចេញមតិអបអរសាទរយ៉ាងច្រើនផុសផុលពីសំណាក់មិត្តភក្ដិក្នុងចង្កោមសិល្បៈ ក៏ដូចជាទទួលបានសំឡេងស្រែកហ៊ោរយ៉ាងកងរំពងពីបណ្ដាទស្សនិកជនអ្នកគាំទ្រ។
ក្រៅពីជោគជ័យដណ្ដើមបានពានរង្វាន់ I Am A Singer Cambodia រដូវកាលទី ៣ នៅក្នុងឆ្នាំ ២០២២ នេះហើយ ឌី សូនិត្តា ក៏ធ្លាប់ទទួលបានពាន Superstar ម្ដងរួចមកហើយនៅឆ្នាំ ២០១៦ នៅក្នុងកម្មវិធី តារាឯកគ្រប់ទម្រង់ APSARA AWARD 2016 រដូវកាលទី ៣ របស់ស្ថានីយ៍ទូរទស្សន៍អប្សរា ដែលកាលនោះមានតារាប្រុសស្រីចំនួន ២០ រូបដែលទទួលបានពានរង្វាន់៕
