(វីដេអូ) មិនស្មានថា Jackson ជួប Buakaw លើកដំបូង លេងជាមួយគ្នាស្និទ្ធស្នាល ដូចមនុស្សស្គាល់គ្នារាប់ឆ្នាំ

ថ្មីៗនេះ កំលោះសង្ហា Jackson បានលេចមុខជាថ្មីម្តងទៀតនៅលើទឹកដីប្រទេសថៃ សម្រាប់ការប្រគំតន្រ្តីរ​បស់ខ្លួនគឺ JACKSON WANG MAGIC MAN WORLD TOUR 2022 ដែលលើកនេះ មហាជនរឹតតែសម្រុកនាំគ្នាមកគាំទ្រលោករង្គើទឹករង្គើដី។

ការប្រគំតន្រ្តីនេះដែរ​ ត្រូវបានប្រព្រឹត្តរួចទៅហើយកាលពីថ្ងៃទី ២៦ ខែវិច្ឆិកា​ ឆ្នាំ ២០២២​ កន្លងទៅនេះ ដែលពិតជាអស្ចារ្យរណ្តំអារម្មណ៍ សមចិត្តអ្នកគាំទ្រដែលចូលទៅទស្សនាមិនស្ទើរឡើយ ពោលគឺកំលោះ Jackson មិនខកបំណងនោះទេ។

យ៉ាងណាមិញ​ គេសង្កេតឃើញថាក្នុងការចុះឡើងប្រទេសថៃកន្លងមកនេះ Jackson ពិតជាមានទំនាក់ទំនងស្និទ្ធស្នាលជាមួយនឹងតារាថៃប្រុសស្រីល្បីៗគ្រប់វិស័យជាច្រើនណាស់ ដែលធ្វើឱ្យតារាៗទាំងនោះ ស្រឡាញ់ពេញចិត្តលោកតែម្តង ម្នាក់ៗចង់តែជួបចង់តែនៅជិតនោះឯង។

ជាក់ស្តែង ថ្មីៗនេះ​ ក្រោយពីបញ្ចប់ការប្រគំតន្រ្តីរួច Jackson ក៏បានមកជួបជាមួយ Buakaw ដែលជាកីឡាករប្រដាល់ល្បីរបស់ថៃហើយ។ ជំនួបលើកនេះរវាងតារាប្រុស និង កីឡាករទាំងពីរ ពិតជាគួរឱ្យស្រឡាញ់ និង រៀងអស់សំណើចបន្តិច ដោយមើលទៅ Jackson ហាក់រំភើបរំជើបរំជួលជាងគេជាងឯងទៅទៀត ប្រហែលព្រោះតែលោកស្រឡាញ់គាំទ្រ Buakaw ខ្លាំងហើយមើលទៅ ហើយពេលបានមកជួបបែបនេះទៀត ក៏ទប់អារម្មណ៍មិនបានឡើយ។

អ្នកទាំងពីរសំណេះសំណាល ព្រមទាំងញ៉ាំអាហារជាមួយយ៉ាងសប្បាយ ហើយលើសពីនេះទៅទៀត Buakaw ក៏បានចុះហត្ថលេខាលើស្រោមដៃប្រដាល់មួយគូឱ្យទៅ Jackson ជាកាដូថែមទៀតផង។ ដោយឡែក មហាជនអ្នកគាំទ្រក៏រំភើបមិនចាញ់គ្នាប៉ុន្មានដែរ ដែលតារាទាំងពីរមានភាពស្និទ្ធស្នាលចុះគ្នាយ៉ាងគួរឱ្យស្រឡាញ់បែបនេះនោះ៕

សូមទស្សនាវីដេអូខាងក្រោម៖