Da Endorphine ញញឹមបិទមាត់មិនជិត ចេញមុខទម្លាយភេទកូនដំបូងហើយ

អ្នកណាខ្លះជាអ្នកគាំទ្រតារាចម្រៀងស្រីរ៉ុក Da Endorphine? ជឿជាក់ថាអ្នកដែលនិយមស្ដាប់ និង តាមដានចម្រៀងថៃមុខជាបានស្គាល់នាងច្បាស់ ព្រោះតែតារាស្រីរូបនេះបានប្រឡូកក្នុងវិស័យចម្រៀងថៃមកជិត ២០ ឆ្នាំហើយ ហើយនាងមានអាល់ប៊ុមចម្រៀងល្បីៗជាច្រើន ហើយក៏មានបទចាក់ដោតដួងចិត្តមិត្តអ្នកស្ដាប់មិនតិចដែរ។

កាលពីចុងខែសីហា ឆ្នាំ ២០២២ កន្លងទៅនេះ Da បានប្រកាសដំណឹងល្អប្រាប់ដល់អ្នកគាំទ្រថា នាងបានពពោះកូនដំបូងហើយ ក្រោយដឹកដៃគូស្នេហ៍ដែលស្រឡាញ់គ្នាជាង ១០ ឆ្នាំចូលរោងការ ដោយការបង្ហាញពីការពពោះនេះ គឺបានធ្វើឡើងនៅថ្ងៃខួបកំណើតខ្លួនផ្ទាល់តែម្ដង។

ក្រោយទទួលបានកាដូដ៏ធំធេងសម្រាប់ជីវិតអស់ជិត ៤ ខែកន្លងមក ពេលនេះ Da និង ស្វាមីបានចេញមុខប្រកាសភេទកូនដំបូងខ្លួនជាសាធារណៈតាមរយៈការបើកប្រអប់កាដូដែលតុបតែងពោរពេញដោយពណ៌ខៀវលាយស បញ្ជាក់ពីភេទប្រុស មានដូចជាមួក អាវ រូបថត ស្បែកជើងជាដើម ដោយបន្ថែមនូវសារថា ​៖ «ទាយត្រូវឬអត់ចាស? ជាកូនប្រុសចាស»៕

ក្រោយឃើញបែបនេះ មហាជនជាច្រើនក៏បានចូលរួមអបអរសាទរ ដែល Da និងស្វាមីទទួលបានចំណងដៃអាពាហ៍ពិពាហ៍ដំបូង ហើយថែមទាំងជាកូនប្រុសទៀត៕