ជិត ៤០ ឆ្នាំហើយ Pakho Chau បង្អួតសាច់ដុំពោះកង់ៗ ជះភាពសង្ហា មើលយូរកាន់តែលង់
កាលពីពេលថ្មីៗនេះ នៅលើបណ្តាញសង្គមរបស់ចិនឃើញមានការចែករំលែករូបថតសន្លឹករបស់តារាសម្ដែងប្រុសសង្ហារបស់ហុងកុង Pakho Chau អំឡុងពេលតារាប្រុសរូបនេះកំពុងថតនៅកណ្តាលផ្ទាំងពណ៌បៃតងក្នុងស្ទូឌីយោ។
ឃើញថា Pakho Chau បានបង្ហាញទឹកមុខយ៉ាងសង្ហាពេញដោយភាពជឿជាក់ ឈរបង្អួតសាច់ដុំពោះកង់ៗរបស់លោក ដែលធ្វើឱ្យក្រុមអ្នកគាំទ្រស្រឡាំងកាំងជាខ្លាំង នៅពេលដែលតារាប្រុសវ័យ ៣៨ឆ្នាំរូបនេះ បញ្ចេញភាពសង្ហាទាក់ភ្នែកបំផុត។
ទោះជាយ៉ាងណាក៏ដោយ ក្នុងនោះក៏មានអ្នកនិយមលេងបណ្តាញសង្គមមួយចំនួនបានគិតថា សាច់ដុំពោះរបស់ Pakho អាចគ្រាន់តែជាស្បែកពាក់បន្លំភ្នែក ដោយមើលទៅដូចជាមានការគូរពីលើពោះ។
យ៉ាងណាមិញ ក៏មានអ្នកគាំទ្រភាគច្រើនជឿថា នេះគឺជាសាច់ដុំពោះពិតប្រាកដរបស់លោក ព្រោះកន្លងមកគេសង្កេតឃើញ Pakho និយមហាត់ប្រាណដើម្បីថែសុខភាព និង រូបរាងរបស់លោកឱ្យមើលទៅកាន់តែរឹងមាំជាងមុន ទោះបីជាអាយុរបស់លោកច្រើនហើយក៏ដោយ៕
