រូបភាព ស៊ីន យូប៊ីន ថតជាមួយ Kimberley កាលពី ៣ ឆ្នាំមុន ត្រូវអ្នកគាំទ្រផ្ទុះបញ្ចេញមតិជាថ្មី

ពិតណាស់ កាលពីថ្ងៃទី ៩ ខែធ្នូ ឆ្នាំ២០១៩ កន្លងទៅ តារាសម្ដែងស្រីប្រចាំប្រទេសកម្ពុជា ស៊ីន យូប៊ីន បានបង្ហោះរូបភាពមួយសន្លឹកដែលខ្លួនបានជួប និង ថតរូបផ្ទាល់ជាមួយនឹងកំពូលតារាសម្ដែងស្រីប្រចាំប្រទេសថៃ គឺ កញ្ញា Kimmy Kimberley នៅឯប្រទេសថៃ។

តួយ៉ាង កាលពី ៣ ឆ្នាំកន្លងទៅនោះ បន្ទាប់ពី យូប៊ីន បានបង្ហោះរួចហើយ អ្នកគាំទ្របានចែករំលែកបន្តយ៉ាងព្រោងព្រាត និង បញ្ចេតញមតិបែបលេងសើច ដោយភាគច្រើនបានភ្ជាប់ជាមួយនឹង Caption ថា៖ «រូបមួយនេះ ប្រៀបដូចជា Kim ជាអ្នកសុំ យូប៊ីន ថតអ៊ីចឹង» ឬ «តើអ្នកណាជាអ្នកសុំថតអ្នកអ្នកណាឱ្យពិតប្រាកដ?»។ល។ ព្រោះក្នុងរូបភាពដែលបានបង្ហោះ បណ្ដាមហាជនអ្នកគាំទ្រ សង្កេតឃើញការតែងខ្លួនរបស់ យូប៊ីន យ៉ាងស៊ីវិល័យ អមជាមួយនឹងវែនតាខ្មៅយ៉ាងកាលីប ចំណែកឯ Kimberley វិញបានស្លៀកពាក់យ៉ាងសាមញ្ញ ជាមួយនឹងអាវយឺតដៃខ្លី ខោខូវប៊យតែប៉ុណ្ណោះ។

យ៉ាងណា នេះគ្រាន់តែជាការគិតបែបលេងសើចរបស់អ្នកគាំទ្រប៉ុណ្ណោះ តែគេសង្កេតឃើញថា អ្នកគាំទ្ររបស់ស្រីស្អាត យូប៊ីន ក៏បានសរសើរពីសម្រស់តារាក្នុងដួងចិត្តរបស់ពួកគេផងដែរ៕