អាយុ ៧២ ឆ្នាំហើយ តួហុងកុង Yuen Wah នៅបញ្ចេញក្បាច់គុនអស្ចារ្យ លឿនដូចរន្ទះ
ពិតណាស់ មិនខុសពី ឈិន ឡុង ឬ លី លានជា អ្វីនោះឡើយ តារាសម្ដែងជើងចាស់ Yuen Wah គឺនៅតែជាតារាប្រុសមួយរូប រក្សាភាពល្បីល្បាញមកទល់បច្ចុប្បន្ន ចាប់តាំងពីលោកក្លាយជាតារាគុនចិនដ៏ល្បីជំនាន់ឆ្នាំ ៨០ មក។
តារាប្រុសជំនាញក្បាច់គុនវ័យ ៧២ ឆ្នាំរូបនេះ គឺបានចូលរួមសម្ដែង និង លេចមុខក្នុងខ្សែភាពយន្តល្បីៗជាច្រើន ក្នុងរយៈពេល ៥ ទសវត្សរ៍ ដែលក្នុងចំណោមរឿងទាំងនោះ វត្តមានរបស់តារាសម្ដែង Yuen Wah ក្នុងរឿងវាយប្រហារបែបកំប្លែងដ៏ល្បី «អ្នកលេងពូថៅហោះ ទិនហ្វី» ឬ «Kungfu Hustle» គឺទទួលបានគាំទ្រខ្លាំងមែនទែន។ ជាមួយគ្នានោះ តារាសម្ដែង Yuen Wah ក៏មានការចូលរួមសម្ដែងក្នុងខ្សែភាពយន្ត «Shang Chi and The Legend of the 10 Rings» របស់ក្រុមហ៊ុន Marvels ផងដែរ។
យ៉ាងណាមិញ មកទល់ពេលថ្មីៗនេះ លោក Yuen Wah ហាក់ស្ងប់ស្ងាត់លើវិថីសិល្បៈ ដោយលោកបានចំណាយពេលផ្ទាល់ខ្លួនជាមួយប្រពន្ធ កូន និង ចៅៗ នាប្រទេសកាណាដា ដែលជាប្រទេសលោកកំពុងរស់នៅបច្ចុប្បន្ន។ ក្នុងនោះដែរ តារាសម្ដែងជើងចាស់រូបនេះ ហាក់ធ្វើឱ្យមហាជនអ្នកគាំទ្របើកភ្នែកធំៗចំហមាត់ព្រាត ក្រោយវីដេអូរបស់លោកមួយ ត្រូវបានចែកចាយ បង្ហាញឱ្យឃើញពីសកម្មភាពរបស់លោក កំពុងបញ្ចេញសមត្ថភាពគុនយ៉ាងពិសេសនាកន្លែងហាត់ប្រាណមួយកន្លែង។
ក្នុងឃ្លីបវីដេអូនោះ បង្ហាញឱ្យឃើញថា លោក Yuen Wah បានធ្វើការរឡាតខ្លួនយ៉ាងមាំទាំបំផុត ទោះបីជាវ័យរបស់លោកពេលនេះកាន់តែជ្រេយ៉ាងណាក៏ដោយ ដែលធ្វើឱ្យអ្នកគាំទ្រអត់ទ្រាំមិនសរសើរមិនបាន ពីរូបរាង និង កម្លាំងដ៏មាំទាំរបស់លោក៕
