យូរៗ Mai Davika ឡើងច្រៀងម្តង បានកាដូ លុយ និង កម្រងផ្កាស្ទើរស្ពាយទៅផ្ទះមិនរួច
Mai Davika គឺជាតារាសម្ដែងស្រីជួរមុខម្នាក់ក្នុងប្រទេសថៃ ដែលបច្ចុប្បន្នកំពុងតែក្តោបបានទីផ្សារសិល្បៈក្នុង និង ក្រៅប្រទេសជាហូរហែ។ សម្រាប់ Mai Davika ក្រៅពីអាជីពជាតារាសម្ដែង នាងក៏មានអាជីពជាតារាបង្ហាញម៉ូដ និង អ្នកតំណាងផលិតផល ប្រ៊េនល្បីៗថែមទៀតផង។
មិនអស់ត្រឹមប៉ុណ្ណឹងឡើយ សម្រាប់តារាស្រីពហុជំនាញដូចជា Mai Davika ថ្មីៗនេះ បានចេញនូវបទចម្រៀងផ្ទាល់ខ្លួនដែលមានចំណងជើងថា « Can I Call You Mind » ដោយទទួលបានការគាំទ្រជាខ្លាំងពីសំណាក់មហាជនក្នុង និង ក្រៅប្រទេស។ គិតមកទល់ថ្ងៃទី ២០ ខែធ្នូ ឆ្នាំ ២០២២ នេះ គេឃើញថាចំនួនអ្នកទស្សនាបានកើនដល់ ៥.៦ M ហើយត្រឹមតែរយៈពេល ២ ខែប៉ុណ្ណោះ ពិតជាគួរឱ្យសរសើរណាស់។
ក្រោយបន្ថែមអាជីពជាតារាចម្រៀងមក តារាស្រី Mai Davika កាន់តែឡើងប្រជាប្រិយភាពមួយកម្រិតទៀត។ តួយ៉ាង កាលពីពេលថ្មីៗនេះ តារាស្រី Mai Davika បានឡើងឆាកប្រគំតន្រ្តីក្នុងកម្មវិធី Music Festival ដែលជាការឡើងច្រៀងលើឆាកដំបូងរបស់នាង បន្ទាប់ពីចេញបទ « Can I Call You Mind »។
ក្នុងកម្មវិធីនោះ គេឃើញថា តារាស្រីទទួលបានការគាំទ្រខ្លាំងពីសំណាក់មហាជន ដោយគ្រាន់តែនាងចេញមកច្រៀងភ្លាមសំឡេងស្រែកហ៊ោផ្តល់កម្លាំងចិត្តលាន់ឮរំពង។ អ្វីដែលសំខាន់ ក្រោយពីច្រៀងចប់ នាងទទួលបានកាដូជាច្រើនរួមមានលុយ និង កម្រងផ្កាជាដើម។ មកទល់ពេលនេះ អាចនិយាយបានថា Mai Davika ជាតារាចម្រៀងពន្លកថ្មី ព្រោះនាងទើបតែផលិតបទចម្រៀង និង ចេញច្រៀងជាលើកដំបូង តែបើនិយាយពីការគាំទ្រ និង ប្រជាប្រិយភាព គឺមិនចាញ់តារាចម្រៀងមុនៗឡើង៕
