ស្ងប់ស្ងាត់ពីសិល្បៈមួយរយៈ តាមពិត Up Poompat សម្ងំរៀនចប់ថ្នាក់អនុបណ្ឌិតពីអង់គ្លេស

ជឿជាក់ថាប្រិយមិត្តដែលនិយមតាមដានរឿងភាគថៃ ជាពិសេសរឿងប្រទេស BL មុខជាបានស្គាល់ច្បាស់ Up Poompat តារាប្រុសវ័យ ២៨ ឆ្នាំដែលមានមុខមាត់ស្រស់ស្អាត មានទេពកោសល្យក្នុងការសម្ដែង ហើយបានសាងប្រជាប្រិយភាពតាមរយៈរឿង «Lovely Writer» ដែលចេញក្នុងឆ្នាំ ២០២១។

ខណៈពេលដែលកំពុងមានប្រជាប្រិយភាពខ្លាំង គេហាក់សង្កេតឃើញថាតារាប្រុសរូបនេះ មិនសូវបង្ហាញមុខនៅក្នុងសង្គមសិល្បៈប៉ុន្មាននោះឡើយ ដោយនៅក្នុងឆ្នាំ ២០២២ នេះ Up បានចេញថតរឿងភាគតែ ១ ប៉ុណ្ណោះ នោះគឺរឿង «Club Sapan Fine 2» ហើយក៏មានថតជាប្រភេទ MV និង ឃោសនាខ្លី ដែលមិនចំណាយពេលយូរ មូលហេតុ Up បានទម្លាយឱ្យដឹងថាគឺលោកចង់ផ្ដោតលើការសិក្សារបស់ខ្លួន។

យ៉ាងណាមិញស្រាប់តែនៅថ្ងៃទី ២១ ខែធ្នូ ឆ្នាំ ២០២២ កន្លងទៅនេះ Up បានបង្ហាញឱ្យដឹងថាលោកបានរៀនចប់ថ្នាក់អនុបណ្ឌិតហើយ ពីសាកលវិទ្យាល័យល្បីឈ្មោះ SOAS Universty of London របស់ចក្រភពអង់គ្លេស ផ្នែកអភិវឌ្ឍន៍សិល្បៈសេរី និងទំនាក់ទំនងអន្ដរជាតិ៕