ប្រុសសង្ហាប៉ះស្រីស្អាត! អ្នកគាំទ្រអន្ទះសាចង់ឃើញ Eunwoo និង Sohee ប៉ះគ្នាម្ដងទៀត

កាលពីខែតុលា ឆ្នាំ ២០២២ កន្លងទៅ តារាប្រុសរូបសង្ហាប្រចាំក្រុម ASTRO លោក Cha Eunwoo រួមជាមួយនឹងតារាសម្ដែងស្រី តួឯកក្នុងរឿង «Nevertheless» កញ្ញា Han Sohee បានសម្ដែងរួមគ្នាជាលើកដំបូង ក្នុងការផ្សព្វផ្សាយគេហទំព័រ Kakao Page ដែលមានចំណងជើងថា «The Villainess Is A Marionette» ធ្វើឱ្យមហាជនអ្នកគាំទ្រជាច្រើនទទួលបានការចាប់អារម្មណ៍យ៉ាងខ្លាំង។

ដោយឡែក នៅថ្ងៃទី ១៣ ខែមករា ឆ្នាំ ២០២៣ កន្លងទៅនេះ យោងតាមរបាយការណ៍ព័ត៌មានរបស់ប្រព័ន្ធផ្សព្វផ្សាយផ្សេងៗរបស់កូរ៉េជាច្រើន បានចេញផ្សាយថា Cha Eunwoo នឹងតារាសម្ដែងស្រី Han Sohee នឹងប៉ះគ្នាម្ដងទៀត សម្រាប់ការថតខ្សែភាពយន្តពាណិជ្ជកម្មម៉ាកសម្លៀកបំពាក់ ម៉ាក Giordano International ឆាប់ៗនេះ។

ជាមួយគ្នានោះ តារាទាំងពីររូបនេះនឹងលេចមុខលើផ្ទាំងប៉ាណូជាច្រើននៅទូទាំងទីក្រុងសេអ៊ូល ក្នុងតំបន់ Gangnam និង ទីកន្លែងជាច្រើនទៀតផងដែរ ធ្វើឱ្យអ្នកគាំទ្រជាច្រើនទន្ទឹងរង់ចាំយ៉ាងអន្ទះសា៕