Apo ឡើងកូដខ្លាំង រហូតខួបកំណើតឆ្នាំនេះអ្នកគាំទ្រសម្រុកទិញកាដូឱ្យ គិតជាលុយជាង ៥០ លានបាត
រាល់អ្នកដែលនិយមតាមដានរឿង BL ច្បាស់ជាបានស្គាល់រួចហើយរឿង «Kinnporsche the Series» ដែលជារឿងបែបម៉ាហ្វៀមួយដែលទទួលបានការចាប់អារម្មណ៍ខ្លាំងពីសំណាក់មហាជន ក្នុង និង ក្រៅប្រទេស។ ជាមួយនឹងប្រភេទរឿងភាគថៃបុរសស្រឡាញ់បុរសបែបបងធំបងតូចនេះ បានអង្រួនចិត្តអ្នកទស្សនាឱ្យចាប់ចិត្តទៅនឹងតួសម្ដែងលោក Nattawin Wattanagitiphat ហៅក្រៅថា Apo ដែលសម្ដែងជាតួអង្គឯកឈ្មោះ Porsche។
ក្រោយពីសម្ដែងរឿងបុរសស្រឡាញ់បុរសមក គេសង្កេតឃើញថាតារាសម្ដែងប្រុស Apo Nattawin ហាក់ជាផ្ទុះប្រជាប្រិយភាព និង ឡើងកូដខ្លាំងជាងមុន ដោយពេលនេះចំនួនអ្នក Followed នៅក្នុងបណ្ដាញសង្គមអ៊ីនស្តាក្រាមកើតដល់ ៣ លាននាក់ឯណោះ។
ដោយឡែក កៀកនឹងថ្ងៃខួបកំណើតអាយុ ២៨ ឆ្នាំ របស់ប្រុសស្អាត Apo ថ្មីៗនេះ អ្នកគាំទ្រតារាប្រុសរូបនេះបានរៀបចំ Pre-Birthday មួយយ៉ាងអធិអធមដើម្បីអបអរដែលតារាក្នុងដួងចិត្តរបស់ពួកគេទទួលបានភាពជោគជ័យយ៉ាងត្រចេះត្រចង់លើវិថីសិល្បៈកាលពីឆ្នាំកន្លងទៅ។
ក្នុងកម្មវិធី Pre-Birthday នោះ តារាប្រុស Apo ទទួលបាននូវកាដូជាច្រើនស្ទើរគ្មានកន្លែងដាក់ទៅហើយពីសំណាក់អ្នកគាំទ្រក្នុង និង ក្រៅប្រទេសរបស់លោក។ ភាគច្រើនកាដូដែលតារាប្រុស Apo ទទួលបានរួមមាន បាច់ផ្កា នាទ្បិកា លុយ និង របស់វត្ថុអនុស្សាវរីយ៍ផ្សេងៗទៀត ដោយកាដូទាំងអស់នោះមានតម្លៃសរុបជាង ៥០ លានបាតដែលស្មើប្រមាណជាង ១ លានដុល្លារឯណោះ៕
