អស់ពីចចាមអារ៉ាមមួយចូលមួយ! សង្ស័យ Shawn ផ្ដើមស្នេហ៍ជាមួយ Sabrina ក្រោយលេចដំរួយនេះ

តារាចម្រៀងប្រុសសញ្ជាតិកាណាដា Shawn Mendes បានចែកផ្លូវគ្នាជាមួយនឹងអតីតមិត្តស្រីរបស់លោក គឺតារាស្រី​ Camila Cabello កាលពីខែវិច្ឆិកា ឆ្នាំ ២០២១ កន្លងទៅ រហូតមកដល់ឥឡូវនេះពុំទាន់មានព័ត៌មានផ្លូវការមួយណាថាតារាប្រុសម្នាក់នេះមានអ្នកស្អំបេះដូងពិតប្រាកដនៅឡើយទេ។ បើក្រឡេកទៅមើលពីចចាមអារ៉ាមស្នេហារបស់លោកវិញ មានឥតឈប់ឈរស្ទើរមិនដាច់ឡើយ។

ដោយឡែក ស្រាប់តែកាល​ពី​ព្រឹក​ថ្ងៃ​ទី ២៧ ខែកុម្ភៈ ឆ្នាំ ២០២៣ នេះ តារា​ចម្រៀង Shawn ត្រូវបានគេប្រទះឃើញលោកដើរលេងដោយបើកចំហជាសាធារណៈជាមួយនឹងតារាស្រី Sabrina Carpenter យ៉ាងស្និទ្ធស្នាល និង រីករាយក្នុងទីក្រុង Los Angeles រដ្ឋ California។

យ៉ាងណាមិញ បន្ទាប់ពីរូបភាពទាំងនោះបានបែកធ្លាយលើបណ្តាញសង្គមយ៉ាងកក្រើកហើយ មកទល់ពេលនេះពុំទាន់មានអ្នកតំណាងរបស់តារាប្រុសស្រីទាំង ២ ចេញមុខបកស្រាយថាចចាមអារ៉ាមនេះជាការពិត ឬ យ៉ាងណានៅឡើយទេ មានតែរង់ចាំតាមដានបន្ត៕