ផ្ទុះហើយ! មានអ្នកចាប់បានថា Yang Yang និង Wang Churan ថើបគ្នាយ៉ាងផ្អែមនៅកោះម៉ាល់ឌីវ

នៅថ្ងៃទី ២៨ ខែមីនា ឆ្នាំ ២០២៣ នេះ នៅតាមបណ្ដាញសង្គម Weibo របស់ប្រទេសចិន កំពុងផ្ទុះការវែកញែកយ៉ាងក្ដៅគគុក ជុំវិញព័ត៌មានចចាមអារ៉ាមមួយដែលផ្ទុះឡើងថា តារាសម្ដែងប្រុស Yang Yang និង តារាស្រី Wang Churan កំពុងបង្កាត់ភ្លើងស្នេហ៍ជាមួយគ្នា។

តាមការលើកឡើងរបស់សាក្សី ដែលអះអាងថា បានឃើញគូស្នេហ៍តារាមួយគូនេះផ្ទាល់ភ្នែក ដោយពួកគេ រួមទាំងមិត្តភក្តិមួយចំនួនទៀតបាននាំគ្នាទៅកម្សាន្តនៅរីស៊តមួយកន្លែងនាកោះ Maldives កាលពីថ្ងៃទី ១៥ ខែកុម្ភៈ កន្លងទៅ។ សាក្សីទាំងនោះបានបញ្ជាក់ទៀតថា តារាទាំង ២ រូបនោះ ថែមទាំងបានថើបមាត់គ្នាយ៉ាងផ្អែមល្ហែមនៅលើឆ្នេរនៃកោះនោះទៀតផង។

យ៉ាងណាមិញ ព័ត៌មានចចាមអារ៉ាមស្នេហារបស់កំពូលតារាសម្ដែងចិននេះដែរ នៅមិនទាន់មានការបញ្ជាក់ឆ្លើយតបឱ្យច្បាស់ការនៅឡើយទេ ប៉ុន្តែបណ្ដាអ្នកគាំទ្ររបស់់តារាទាំងគូនោះ នៅតែគិតថា នេះគ្រាន់តែជារឿងចចាមអារ៉ាមដដែលៗ ព្រោះថា Yang Yang គឺជាកំពូលតារាល្បី ឯ Wang Churan ជាតារាស្រីដែលមានរូបស្រស់សោភា ដូច្នេះចចាមអារ៉ាមបែបនេះ តែងតែកើតមានឡើងក្នុងសង្គមសិល្បៈចិនជានិច្ច។

ជាក់ស្ដែង នេះមិនមែនជាលើកទីមួយឡើយ ដែល Yang Yang និង Wang Churan ផ្ទុះរឿងអាស្រូវទាក់ទងគ្នានោះ ព្រោះកាលពីចុងឆ្នាំ ២០២២ កន្លងទៅ blogger នៅចិនម្នាក់ បានចេញការសង្ស័យមួយពីតារាចិន ២ ដួងកំពុងទាក់ទងស្នេហាគ្នា ដោយខាងប្រុសជាអ្នកមកពីគ្រួសារអក្សរ Y និង ខាងស្រី ជាអ្នកមកពីគ្រួសារអក្សរ W។ តាមដំរួយដែល Blogger រូបនោះបង្ហើប មហាជនអ្នកគាំទ្រជាច្រើននឹកភ្នកភ្លាមទៅដល់តារាប្រុស Yang Yang និង Wang Churan ដែលជាតារាក្រោមក្រុមហ៊ុនជាមួយគ្នា៕