៥ ចំណុចដែលធ្វើឱ្យ IU មានឥទ្ធិពលខ្លាំងលើអ្នកគាំទ្រស្ទើរពាសពេញពិភពលោក
ជាតារាចម្រៀង ហើយក៏ជាតារាសម្ដែងដ៏ល្បីល្បាញប្រចាំប្រទេសកូរ៉េ និង ស្ទើរតែទូទាំងពីភពលោក ស្រីស្រស់ Lee Ji Eun ឬ IU មិនត្រឹមតែជាតារាស្រី ដ៏មានទេពកោសល្យខ្ពស់ទេ ប៉ុន្តែនាងក៏មានរូបរាងស្រស់ស្អាតខ្លាំងទាក់ភ្នែកអ្នកគាំទ្រទូទៅផងដែរ។
ពាក់ព័ន្ធនឹងតារាស្រីដ៏មានប្រជាប្រិយភាពវ័យក្បែរ ៣០ ឆ្នាំ រូបនេះដែរ នាថ្ងៃនេះ «ប្រជាប្រិយ» នឹងបង្ហាញពី ៥ ចំណុចដែលធ្វើឱ្យ IU មានឥទ្ធិពលខ្លាំងមកលើអ្នកគាំទ្រស្ទើរជុំវិញសកលលោក។ តើមានចំណុចអ្វីខ្លះ? តស់! អានទាំងអស់គ្នា៖
១. សមត្ថភាពសម្តែងដ៏ស័ក្តិសម
សឹងតែគ្រប់រឿងដែល IU បានចូលរួមសម្តែង តែងតែទទួលបានការគាំទ្រខ្ពស់ និង មានអត្រាអ្នកទស្សនាច្រើន ព្រោះតែការសម្តែងដ៏ល្អឥតខ្ចោះ និង ស័ក្តិសម មិនថារឿងសម័យ ឬ បុរាណឡើយ តារារូបនេះនៅតែអាចបត់បែនបានគ្រប់កាលៈទេសៈ ដែលស្តែងឱ្យឃើញ ពីភាពរស់រវើកក្នុងសាច់រឿង ធ្វើឱ្យអ្នកគាំទ្រចូលចិត្តយ៉ាងខ្លាំង។
២. ទេពកោសល្យមានសឹងគ្រប់ទម្រង់
មិនត្រឹមតែការសម្ដែងល្អតែមួយមុខទេ IU ក៏ជាកំពូលតារាចម្រៀងស្រីមួយរូប ដែលអាចច្រៀង អាចនិពន្ធទំនុកច្រៀង ព្រមទាំងអាចលេងហ្គីតាបានដោយខ្លួនឯងថែមទៀតផង។
៣. រូបរាង និង សម្រស់ស្រស់ស្អាតពីធម្មជាតិ
ទេពកោសល្យសិល្បៈ គឺជារឿងមួយផ្នែក ប៉ុន្តែរូបរាងដ៏តូចច្រលឹង និង សម្រស់ដ៏ស្រស់ស្អាតស្លៀកពាក់អ្វីក៏សមរបស់ IU ក៏បានជះឥទ្ធិពលលើអ្នកគាំទ្រជាច្រើនឱ្យឈ្លក់វង្វេងផងដែរ។ ហើយនាងតែងតែទទួលបានការកោតសរសើរមិនដាច់ពីមាត់ឡើយលើចំណុចមួយនេះ។
៤. អត្តចរិតល្អ
មិនត្រឹមតែមានសម្រស់ស្រស់ស្រទន់ស្អាត និង មានទេពកោសល្យសិល្បៈខ្លាំងតែប៉ុណ្ណោះទេ សូម្បីតែអត្តចរិតរបស់ IU ក៏រឹតតែពិសេសខ្លាំង ព្រោះនាងជាតារាស្រី ដែលមានចរិតស្លូតបូតជាទីគាប់ចិត្តរបស់អ្នកគាំទ្រ ក៏ដូចជាមហាជនផងដែរ។ លើសពីនេះ កំពូលតារាស្រី IU នៅមានចិត្តបុណ្យ ក្ដីមេត្តាចេះជួយយកអាសាអ្នកខ្សត់ខ្សោយ តាមរយៈកិច្ចការសប្បុរសធម៌ជាច្រើនថែមទៀតផង។
៥. ភាពរួសរាយទាក់ទាក់ជាមួយនឹងអ្នកគាំទ្រ
ចំណុចនេះ គឺសំខាន់ណាស់ ហើយអ្នកគាំទ្រជាច្រើនក៏មិនដែលអស់សង្ឃឹមនឹងតារាស្រីរូបនេះម្តងណាឡើយ។ កន្លងមក តាមរយៈសារព័ត៌មាននានា និង តាមរយៈអ្នកគាំទ្រដែលធ្លាប់បានជួបនាងផ្ទាល់ តែងតែចែករំលែកព្រោងព្រាតពីតារាស្រី IU ថា នាងគឺមានភាពរួសរាយរាក់ទាក់ជាមួយនឹងអ្នកគាំទ្រខ្លាំងណាស់។ ជាក់ស្ដែង ពេលបង្ហាញវត្តមានជួបអ្នកគាំទ្រម្តងៗ រូបនាងតែងតែផ្តល់ភាពស្និទ្ធស្នាល និង ចាប់ដៃ ឬ ថតរូបជាមួយអ្នកគាំទ្រជានិច្ច ដោយមិនមានអារម្មណ៍ធុញទ្រាន់ឡើយ៕
