ទើសភ្នែកពេក! នាយ ពាក់មី សុំចិត្តអ្នកសម្ដែងថតវីដេអូ ធ្វើជាយកនារីទៅគេងហើយឱ្យលុយមិនគ្រប់ ឈប់បានឈប់ទៅ

នាយ ពាក់មី បានប្រឡូកក្នុងវិស័យសិល្បៈផ្នែកកំប្លែងជាង ១០ ឆ្នាំមកហើយ ក៏អាចចាត់ទុកថា លោកគឺជាអ្នកសិល្បៈរៀមច្បងមួយរូបពោរពេញដោយបទពិសោធជាច្រើន ហើយកន្លងមក ក្នុងសាច់រឿងកំប្លែងរបស់លោក មិនត្រឹមតែធ្វើឱ្យទស្សនិកជនសើចក្អាកក្អាយបំភ្លេចអស់ទុក្ខកង្វល់ទេ តែក៏មានបង្គប់នូវសាច់រឿងអប់រំក្នុងសង្គមបច្ចុប្បន្នផងដែរ។

ជាការពិត កន្លងមក នាយ ពាក់មី ច្រើនតែលេងពាក្យលេងសម្ដីកំប្លុកកំប្លែងធ្វើឱ្យមហាជនសើចសប្បាយ ដោយឡែកថ្មីៗនេះ នាយ ពាក់មី ស្រាប់តែបង្ហោះសារប្លែកមួយនៅលើគណនីហ្វេសប៊ុកផេក រៀបរាប់រឿងវីដេអូសម្ដែងធ្វើឱ្យខូចតម្លៃស្រ្តីខ្មែរ។

សារនោះ នាយ ពាក់មី បានរៀបរាប់ថា ៖ «ឃើញវីដេអូ ធ្វើបែកធ្លាយ (សម្តែង) រឿងយកនារីទៅគេង ឱ្យលុយមិនគ្រប់ ហើយខាងស្រីថតផុស ឈប់បានឈប់ទៅអ្នកសម្តែងអើយ បះពាល់ដល់តម្លៃស្ត្រីខ្មែរយើង ទៅជាមុខរបរផ្លូវភេទ ផុសពេញហ្វេកប៊ុក …… និយាយតែប៉ុណ្ណឹងចុះ»។

ក្រោយការបង្ហោះរបស់ នាយ ពាក់មី គេឃើញមានមហាជនជាច្រើន បានចូលរួមបញ្ចេញយោបល់ព្រោងព្រាត ដោយមតិជាច្រើនយល់ស្របជាមួយលោកឱ្យបញ្ឈប់សកម្មភាពបែបនោះទៅ៕