ក្តៅគគុក! អ្នកគាំទ្រក្តៅចិត្ត ក្រោយឃើញជនឆ្លៀតឱកាសយករូបថតកាត Moonbin ដាក់លក់លើសតម្លៃដើម
ការចាកចេញភ្លាមៗរបស់ Moonbin សមាជិក ASTRO បានធ្វើឱ្យអ្នកគាំទ្រភ្ញាក់ផ្អើល និង នឹកសោកស្តាយជាខ្លាំង ដោយអ្នកគាំទ្រតាមបណ្តាប្រទេសនានា និង គ្រប់ទីកន្លែងក្នុងប្រទេសកូរ៉េខាងត្បូង បានចូលរួមកាន់ទុក្ខដល់វិញ្ញាណក្ខន្ធរបស់លោក។
ក្នុងនោះដែរ អ្នកគាំទ្រជាច្រើនក៏បានប្រមូលអាល់ប៊ុម និង រូបថតកាត ព្រមជាមួយនឹងវត្ថុអនុស្សាវរីយ៍ដែលមានរូបថតរបស់ Moonbin មកដល់នៅទីកន្លែងដែលពួកគេបានធ្វើដើម្បីកាន់ទុក្ខដល់លោក។
អំឡុងពេលអ្នករាល់គ្នាមានទុក្ខក្រៀមក្រំចំពោះមរណភាពរបស់ Moonbin ស្រាប់តែឃើញមានអ្នកលក់តាមអនឡាញជាច្រើនបានឆ្លៀតឱកាសកេងចំណេញយកប្រយោជន៍ពីការដំឡើងតម្លៃនៃការលក់រូបថតកាតរបស់ Moonbin ថ្លៃខ្លាំងធៀបនឹងពីមុន។
ជាហេតុធ្វើឱ្យក្រុមអ្នកគាំទ្ររបស់តារាប្រុសរូបនេះ មានការខឹងសម្បាជាខ្លាំង ព្រោះនេះបានបង្ហាញអំពីទង្វើមិនគោរពដល់អ្នកដែលបានបាត់បង់ជីវិត។ លើសពីនេះ នៅលើបណ្តាញសង្គមផ្សេងៗក៏មានមហាជនភាគច្រើនបានចូលទៅរិះគន់មិនសំចៃមាត់ ដោយគេបានបង្ហាញពីភាពឈឺចាប់ និង ខកចិត្ត ក្នុងការរកលុយចំណេញក្នុងស្ថានភាពបែបនេះ ហើយនេះជាការមិនគោរពដល់វិញ្ញាណក្ខន្ធរបស់ Moonbin។
សូមរំឭកផងដែរថា បន្ទាប់ពី Moonbin បានទទួលមរណភាពកាលពីថ្ងៃទី ១៩ ខែមេសា ឆ្នាំ ២០២៣ រាល់សកម្មភាពក្នុងសិល្បៈទាំងអស់របស់ក្រុម ASTRO ត្រូវបានលុបចោល ដើម្បីចូលរួមកាន់ទុក្ខដល់តារាប្រុសរូបនេះ៕
