កូនប្រសាល្អរកគ្មាន! Se7en លុតជង្គង់និយាយពាក្យរំជួលចិត្ត រហូតម្ដាយក្មេកទប់ទឹកភ្នែកមិនជាប់
នៅក្នុងកម្មវិធី «Same Bed Different Dreams 2» គូស្នេហ៍តារាកូរ៉េដ៏ល្បី Se7en និង Lee Da Hae បានមានវត្តមានចូលរួមទម្លាយអំពីរឿងរ៉ាវជីវិតឯកជនរបស់ពួកគេ ចាប់តាំងពីអ្នកទាំងពីរបានប្រកាសរៀបអាពាហ៍ពិពាហ៍មក។
យ៉ាងណាមិញ នៅថ្ងៃរៀបការរបស់តារាប្រុសស្រីទាំងពីរ ក្នុងនោះ Se7en បានបង្ហើបថា លោកបានបង្ហាញអារម្មណ៍មនោសញ្ចេតនារបស់លោកទៅកាន់ម៉ាក់ក្មេក ទាំងកណ្តាលឆាកខណៈគាត់បានដឹកដៃកូនក្រមុំឡើងឆាក។
នៅចំពោះមុខភ្ញៀវកិត្តិយសរាប់រយនាក់ដែលបានចូលរួមក្នុងពិធីមង្គលការ បានធ្វើជាសាក្សីសំខាន់របស់ Se7en នៅពេលលោកបានលុតជង្គង់គោរពនឹងបើកប្រអប់ចិញ្ចៀនបង្ហាញនៅមុខម្ដាយក្មេក ថែមទាំងនិយាយទៅកាន់គាត់ថា៖ «អ្នកម៉ាក់ក្មេកមិនដែលទុកឱ្យ Da Hae នៅម្នាក់ឯងទេ អស់រយៈពេលជិត ៤០ឆ្នាំមកនេះ ពេលនេះម៉ាក់ក្មេកបានឱ្យកូនស្រីទៅរស់នៅជាមួយស្វាមីនាងហើយ ចាប់ពីពេលនេះតទៅ សូមម៉ាក់ចាត់ទុកខ្ញុំជាកូនប្រុសរបស់ម៉ាក់ម្នាក់ទៀតផង»។
សម្រាប់ពិធីមង្គលការរបស់ Se7en និង Lee Da Hae គឺបានធ្វើឡើងកាលពីថ្ងៃទី ០៦ ខែឧសភា ឆ្នាំ ២០២៣ នៅឯសាល Dynasty Hall នៃសណ្ឋាគារ Shilla ហើយមង្គលការនេះបានអញ្ជើញភ្ញៀវកិត្តិយសជាច្រើនសុទ្ធសឹងជាតារាល្បីៗក្នុងវិស័យកម្សាន្តកូរ៉េ៕
