កាន់តែកក្រើករឿង សុខុម រចនា Cover បទ «How About Now?» ស្រាប់តែ ខាត់ សុឃីម លូកមាត់បញ្ចេញយោបល់យ៉ាងក្តៅឡើងភ្លែត

ពិតណាស់ មហាជនអ្នកប្រើប្រាស់បណ្ដាញសង្គមហ្វេសប៊ុក និង Tiktok នាប៉ុន្មានថ្ងៃចុងក្រោយនេះ បានជជែកវែកញែកខ្លាំងពាក់ព័ន្ធនឹងបទចម្រៀង «How About Now?» ដែលក្លាយជាប្រធានបទដ៏ក្ដៅគគុក បន្ទាប់ពី សុខុម រចនា បានច្រៀង Cover បទចម្រៀងមួយបទនេះ ធ្វើឱ្យផ្ទុះល្បីល្បាញកាន់តែខ្លាំង យកទៅច្រៀងលើឆាក The Voice Cambodia រដូវកាលទី ៣ ព្រមទាំងពោលពាក្យអរគុណអ្នកគាំទ្រដែលបានចុចចូលទស្សនាបទនេះរហូត ៣០ លានដង។

ជាមួយនឹងសកម្មភាពរបស់ សុខុម រចនា បានបង្កឱ្យផ្ទុះការបញ្ចេញមតិវែកញែកពីមហាជនពាសពេញបណ្ដាញសង្គម ដោយមានការប្រតិកម្មឆ្លើយតបថា រចនា ត្រឹមជាអ្នក Cover ប៉ុណ្ណោះ ប៉ុន្ដែបង្ហាញទង្វើហាក់បីដូចជាម្ចាស់ទៅវិញ ខណៈលោក ជី ដេវីត ដែលជាម្ចាស់បទពិតប្រាកដ បែររក្សាភាពស្ងៀមស្ងាត់ទៅវិញ។ តែយ៉ាងណាក៏មានមហាជនមួយចំនួនលើកឡើងពីទេពកោសល្យរបស់ រចនា ដែលនាងនៅវ័យក្មេង តែមានសំឡេងពីរោះ មានសមត្ថភាព និង ភាពក្លាហានពេញខ្លួន។

យ៉ាងណាមិញ ខណៈប្រធានបទមួយនេះនៅតែក្ដៅ ដោយត្រូវបានមហាជន ក៏ដូចជាអ្នកសិល្បៈមួយចំនួនលើកយកទៅវែកញែកបន្តបន្ទាប់នោះ គេក៏បានឃើញបណ្ដាញសង្គមហ្វេសប៊ុកផេករបស់តារាស្រីពហុជំនាញអ្នកនាង ខាត់ សុឃីម ក៏បានបង្ហោះសារនិយាយជាយោបល់ទៅកាន់ សុខុម រចនា ដោយលើកឡើងថា ៖ «បើពេលនោះប្អូនស្រី “ខ្ញុំមិនមែនម្ចាស់បទទេបង ខ្ញុំគ្រាន់តែជាម្ចាស់សំឡេង Version អកកេស បង G-Devit ទើបជាម្ចាស់បទ ហើយក៏សូមអរគុណបងប្អូនចំពោះ 30 លាន view” ប្អូនប្រាកដជាទទួលបានការគាំទ្រច្រើនខ្លាំងតែម្តង សំខាន់មានតែម្ចាស់បទមួយនេះទេ ដែលពេលលើកពានអរគុណអ្នក Cover សំខាន់ប្រកាសថា បើជាប់ Copyright ប្រាប់គាត់ដោះឱ្យទៀត! (ងើយស្កក ឱនដាក់គ្រាប់)»៕