រូបពីរសន្លឹកនេះ ធ្វើឱ្យអ្នកគាំទ្ររបស់ Paing និង វត្តី នៅមិនស្ងប់ទៀតហើយ

បើនិយាយដល់បវរកញ្ញា ពេជ្រ វត្តីសារ៉ាឌ្ឍី និង តារាសម្ដែងប្រុសមីយ៉ាន់ម៉ា Paing Takhon ខណៈបានសម្ដែងប៉ះគ្នាជាលើកដំបូងក្នុងរឿងខ្នាតធំ «ប្រុសលក់ខ្លួន» មួយរយៈនេះកន្លងទៅ ត្រូវបានអ្នកគាំទ្រចាប់អារម្មណ៍ និង សរសើរខ្លាំងជាមួយនឹងសកម្មភាពរួមការងារសម្ដែងជាដៃគូដ៏ស័ក្តិសម និង សកម្មភាពក្រៅឆាករបស់អ្នកទាំងពីរស្និទ្ធស្នាលគួរឱ្យស្រឡាញ់ខ្លាំង។

លើសពីនេះ មហាជនអ្នកគាំទ្រលើបណ្ដាញសង្គមទាំង TikTok និង ហ្វេសប៊ុក តែងចាប់អារម្មណ៍បង្ហោះចែករំលែកខ្លាំងពីសកម្មភាពក្រៅឆាកដ៏ផ្អែមល្ហែមរបស់អ្នកទាំងពីរបន្តបន្ទាប់ ដោយបង្ហាញការពេញចិត្តខ្លាំងចំពោះសកម្មភាពដ៏គួរឱ្យស្រឡាញ់របស់ទាំងពីរ។

ដោយឡែក ថ្មីៗនេះ ក្រោយពីបានបញ្ចប់ការថតភាពយន្តជាមួយគ្នាយ៉ាងរលូនហើយ ខណៈតារាប្រុសមីយ៉ាន់ម៉ា Paing ក៏បានត្រឡប់ទៅស្រុកកំណើតវិញ គេក៏បានឃើញបណ្ដាញសង្គមហ្វេសប៊ុករបស់បវរកញ្ញា ពេជ្រ វត្តីសារ៉ាវឌ្ឍី បង្ហោះរូបភាពជាច្រើនសន្លឹកដើរផ្សារទំនើប ដែលក្នុងនោះកំពុងធ្វើឱ្យអ្នកគាំទ្រចាប់អារម្មណ៍ និង រំភើបខ្លាំង ពេលឃើញរូបភាព ២ សន្លឹកដែល ពេជ្រ វត្តីសារ៉ាវឌ្ឍី និង Paing ថតកាន់ដៃគ្នាយ៉ាងស្និទ្ធ៕