ខំសាងកេរ្តិ៍ឈ្មោះមក ១៨ ឆ្នាំ ចុងក្រោយជីវិតសិល្បៈ Aaron Yan ត្រូវហិនហោចខ្លោចផ្សា ព្រោះរឿងបំពានមិត្តប្រុសមិនទាន់គ្រប់អាយុ
បើតាមសារព័ត៌មាន ETtoday បានចុះផ្សាយកាលពីថ្ងៃទី ២៤ ខែមិថុនា ឆ្នាំ ២០២៣ ឱ្យដឹងថា តារាសម្ដែងប្រុស Aaron Yan ត្រូវបានលោក Yao Le ដែលគេស្គាល់ថាជាតារា TikTok និងជាមិត្តប្រុសរបស់តារាប្រុសរូបនេះ ចោទប្រកាន់ពីបទបង្ខិតបង្ខំឱ្យរួមភេទ និង ថតវីដេអូ ហើយបែកធ្លាយតាមអ៊ីនធឺណេត។
តារាសម្ដែង Aaron Yan
ពាក់ព័ន្ធនឹងរឿងអាស្រូវដ៏ក្តៅគគុកមួយនេះ លោក Aaron Yan ក៏បានសារភាពទទួលស្គាល់កំហុសរបស់ខ្លួន ព្រមទាំងសន្យាទទួលខុសត្រូវនូវអ្វីដែលខ្លួនបានធ្វើ ហើយបានឱនក្បាលសុំទោសអតីតមិត្តប្រុសទាំងទឹកភ្នែក នៅក្នុងសន្និសីទកាសែតផងដែរ។
ទោះជាយ៉ាងណាក៏ដោយ ក៏មានប្រភពផ្សេងៗទៀតបាននិយាយថា ការបង្ហាញខ្លួនរបស់លោក Aaron Yan នៅក្នុងសន្និសីទកាសែតគឺគ្រាន់តែជាការសម្ដែង នៅចំពោះមុខសាធារណជន និង សារព័ត៌មានប៉ុណ្ណោះ។
លើសពីនេះ គេថែមទាំងទម្លាយទៀតថា ច្រើនឆ្នាំមកនេះ តារាប្រុសរូបនេះមិនដែលខ្វល់ពីកិត្តិយសរបស់ Yao Le នោះទេ បើទោះជាខ្លួនគាត់ផ្ទាល់ជាអ្នកធ្វើឱ្យបែកធ្លាយវីដេអូលើគ្រែជាមួយនឹងអនីតិជនក៏ដោយ។
ហើយការបង្ហាញខ្លួនរបស់ Aaron Yan ក្នុងសន្និសីទកាសែតនៅពេលនោះ បានធ្វើឱ្យ Yao Le មានសម្ពាធកាន់តែខ្លាំង ប៉ុន្តែ Yao Le បានទទួលការលើកទឹកចិត្តពីមិត្តភក្តិជុំវិញខ្លួនរបស់គេ ដោយព្យាយាមរក្សាភាពស្ងប់ស្ងាត់ ក្រោយពីត្រូវបានប្រឈមមុខផ្ទាល់ជាមួយនឹង Aaron Yan។
យ៉ាងណាមិញ ក្រោយពីជាប់ពាក់ព័ន្ធនឹងរឿងអាស្រូវដ៏ធ្ងន់ធ្ងរបែបនេះ Aaron Yan ត្រូវប្រឈមមុខនឹងការធ្វើពហិការជាសាធារណៈ។ បច្ចុប្បន្ននេះ ប៉ូលិសក៏បានបើកការស៊ើបអង្កេតលើរឿងអាស្រូវរបស់គាត់ផងដែរ សូម្បីតែការងារក្នុងអាជីពសិល្បៈរយៈពេល ១៨ ឆ្នាំរបស់លោកក្នុងវិស័យកម្សាន្តតៃវ៉ាន់ក៏ត្រូវបានផ្អាកចោលទាំងអស់ដែរ៕
