ក្នុងថ្ងៃកំណើត Chompoo ទម្លាយមិនចង់បានអ្វី តែស្វាមីមិននៅស្ងៀមធ្វើរឿង Surprise នាងយ៉ាងផ្អែមល្ហែមបំផុត

ធ្មេចបើកៗ តារាស្រីលំដាប់ជួរមុខ Chompoo កើនអាយុមួយឆ្នាំទៀតហើយ ដោយនៅថ្ងៃទី ២៨ ខែមិថុនា ឆ្នាំ ២០២៣ កន្លងទៅ ជាថ្ងៃកំណើតគម្រប់អាយុ ៤២ ឆ្នាំរបស់នាង។ ថ្វីដ្បិតតែអាយុចូលដល់ ៤២ ឆ្នាំហើយក៏ដោយ តែមហាជននៅតែលាន់មាត់សរសើរថា នាងមានសម្រស់ក្មេងដដែលហាក់មិនចាស់តាមវ័យទាល់តែសោះ។

យ៉ាងណាមិញ សម្រាប់ថ្ងៃកំណើតឆ្នាំនេះដែរ ឃើញថាបើទោះជានាងជាភរិយាសេដ្ឋីសម្បូរទ្រព្យ តែ Chompoo  បែរជាបោះសម្តីថា នាងមិនប្រាថ្នាអ្វីច្រើននោះទេ ប្រាថ្នាតែក្តីសុខតូចៗធ្វើបុណ្យជុំកូនៗ និង ស្វាមិជាទីស្រឡាញ់តែប៉ុណ្ណោះនៅក្នុងថ្ងៃកំណើតឆ្នាំនេះ។

ដោយឡែក បើទោះបីជា Chompoo ប្រាថ្នាចង់ធ្វើបុណ្យជុំគ្រួសារ មិនប្រាថ្នាអ្វីច្រើនពីគ្រួសារ និង ស្វាមីក៏ដោយ តែបើងាកទៅមើលលោក Note Visarut វិញ ហាក់មិនព្រងើយកណ្តើយនឹងថ្ងៃកំណើតរបស់ភរិយាឡើយ ទោះមិនបានរៀបចំពិធីធំដុំ តែលោក និង កូនប្រុសទាំងពីរ បានកាន់នំខេកម្នាក់មួយមក Surprise ភរិយាយ៉ាងផ្អែមល្ហែម ពិសេសមានទាំងបាច់ផ្កាយ៉ាងស្រស់ស្អាតជូនឧត្តមភរិយាជាទីស្រឡាញ់ថែមទៀតផង៕