មកដល់កម្ពុជាប៉ុន្មានថ្ងៃ ខ្មែរមួយជីវិត ឱ្យអ្នកគាំទ្រអន្ទះសាចង់ឃើញស្នាដៃរួមគ្នានឹង Rapper ដទៃ

បើគិតមកដល់ពេលនេះ រយៈពេលប្រមាណជិត ១០ ថ្ងៃហើយ ដែល​លោក ឡេង សុវណ្ណារ៉ា ឬក្នុងវិស័យចម្រៀងរ៉េបគេស្គាល់ឈ្មោះថា «ខ្មែរមួយជីវិត» បានមកដល់ប្រទេសកម្ពុជាហើយ ក្រោយពីលោកខកខានមកស្រុកកំណើតជាច្រើនឆ្នាំ។

ក្នុងការមកដល់កម្ពុជាលើកនេះដែរ ខ្មែរមួយជីវិត ក៏បានត្រៀមបង្ហាញវត្តមានជា Coach និង គណៈកម្មការក្នុងកម្មវិធីប្រកួតចម្រៀងរ៉េប​ «The Rapper Cambodia» ជាមួយនឹង Rapper ជាច្រើនទៀត រួមមានលោក វណ្ណដា, លោក Kingchi លោក Ruthko, លោក Norint និង លោក Juvie Lin ជាដើម។

ជាការពិត ក្រោយមកដល់កម្ពុជាមិនបានប៉ុន្មានថ្ងៃ លោក ខ្មែរមួយជីវិត បានស្កាត់ជួបគ្នានឹងអ្នកសិល្បៈកម្ពុជាជាច្រើន ជាពិសេសនោះ គឺតារាចម្រៀងរ៉េបតែម្តង។ ចំណុចនេះដែរ ក៏បានធ្វើឱ្យអ្នកគាំទ្រកាន់តែអន្ទះសាចង់ឃើញស្នាដៃរួមគ្នារវាងលោក និង តារាចម្រៀងរ៉េបដទៃ ជាពិសេសនោះ គឺស្នាដៃរួមគ្នានឹងតារាចម្រៀងរ៉េបវ័យក្មេង វណ្ណដា តែម្តង៕