សំងំសាងគ្រួសារមួយរយៈ! តួអង្គ ចាវីន ក្នុងរឿង «បេសកកម្ម» ប្រកាសវិលត្រឡប់មកវិញផលិតរឿងខ្លី
រំឭកទៅដល់ខ្សែភាពយន្តភាគ ផលិតដោយលោក ម៉ានិត រឿង «បេសកកម្មមួយ» ឬ «One Mission» ប្រិយមិត្តប្រាកដជាបានស្គាល់ហើយនូវតួអង្គប្រុសមួយរូបឈ្មោះ ចាវីន ដែលសម្តែងដោយលោក មឿន ពិសិដ្ឋ ។ មហាជនចាំបានថា កាលពីអំឡុងឆ្នាំ ២០១៨ លោកមានជំងឺរលាកស្រោមខួរ ក្រោយមកក៏បានបាត់មុខក្នុងវិស័យសិល្បៈស្របគ្នាតែម្តង។
យ៉ាងណាមិញ កាលពីថ្ងៃទី ២២ ខែមេសា ឆ្នាំ ២០២១ កន្លងទៅនេះ លោក ពិសិដ្ឋ តួអង្គ ចាវីន ក្នុងរឿង «បេសកកម្មមួយ» នេះ ក៏បានទទួលសមាជិកថ្មីជាកូនប្រុសដំបូងរួចហើយដែរ ក្រោយពីលោកបានរៀបការយ៉ាងស្ងប់ស្ងាត់កាលពីអំឡុងឆ្នាំ ២០២០។
ក្រោយពីបញ្ចប់អាជីពសិល្បៈ សាងគ្រួសារពោរពេញដោយសុភមង្គលមួយរយៈធំហើយនោះ មហាជនអ្នកគាំទ្រក៏ហាក់នឹករឭកដល់អតីតតារាប្រុសរូបនេះ ដោយពួកគេចង់ដឹងពីសុខទុក្ខជីវិតឯកជនរបស់លោកផងដែរ។
ដោយឡែកស្រាប់តែនៅថ្ងៃទី ២២ ខែសីហា ឆ្នាំ ២០២៣ មហាជនអ្នកគាំទ្រក៏មានការភ្ញាក់ផ្អើល និង ចាប់អារម្មណ៍យ៉ាងខ្លាំង ក្រោយពីឃើញលោក ពិសិដ្ឋ បានបង្ហោះសារនឹងវិលត្រឡប់មកកាន់សិល្បៈវិញ ដោយលោកកំពុងស្វែងរកតួ ដើម្បីចូលរួមថត Short Film៕
